Fótbolti

Víkingar til Kósóvó en Vals­menn til Eist­lands

Óskar Ófeigur Jónsson skrifar
Gylfi Þór Sigurðsson og félagar í Víkingi eru á leiðinni til Kósóvó.
Gylfi Þór Sigurðsson og félagar í Víkingi eru á leiðinni til Kósóvó. vísir/Diego

Víkingar og Valsmenn fengu að vita það í dag hvaða liðum þau mæta í fyrstu umferð undankeppni Sambandsdeildarinnar.

Dregið var í fyrstu umferðina í höfuðstöðvum UEFA í dag en á morgun verður síðan dregið í aðra umferð. KA-menn sitja hjá í fyrstu umferðinni en eru í sömu keppni eins og Víkingur og Valur.

Víkingar drógust gegn FC Malisheva frá Kósóvó en þeir gátu einnig lent á móti Cliftonville frá Norður-Írlandi, Nõmme Kalju frá Eistlandi og Haverfordwest County frá Wales.

Valsmenn drógust á móti Flora Tallinn frá Eistlandi en þeir gátu einnig lent á móti KÍ Klaksvík frá Færeyjum, Larne frá Norður-Írlandi og Kauno Žalgiris frá Litháen.

Fyrri leikurinn fer fram 10. júlí en sá seinni 17. júlí. Valsmenn byrja á heimavelli en Víkingar byrja á útivelli.

Flora Tallinn mætti Víkingum í þriðju umferð undankeppninnar í fyrra og tapaði þá 3-2 samanlagt. Víkingar unnu útileikinn 2-1 eftir 1-1 jafntefli hér heima.

Malisheva er að taka þátt í Evrópukeppni í annað skiptið en liðið tapaði 3-1 samanlagt á móti Buducnost Podgorica í fyrstu umferð undankeppni Sambandsdeildarinnar í fyrra.

Sambandsdeild Evrópu Valur Víkingur Reykjavík

Mest lesið


Fleiri fréttir

Sjá meira


×

Mest lesið