Gummi Ben: Erum við að fara að sjá Jóhannes Karl snúa aftur í Skagaliðið?

ÍA lét Jón Þór Hauksson fara eftir tapleik á móti nýliðunum en þetta var áttunda tap liðsins í ellefu leikjum.

„Það á eftir að koma í ljós hvort þetta hafi verið rétt í stöðunni eða ekki. Þetta er búið að vera rosalega erfitt. Það er ekki nóg með að þeir séu neðstir í deildinni heldur hafa þeir verið að tapa leikjum illa,“ sagði Lárus Orri Sigurðsson, sérfræðingur Stúkunnar.

Guðmundur benti þá að í 4-1 tapinu á móti Aftureldingu þá hafi leikurinn opnast undir lokin með þessari niðurstöðu.

„Þegar Afturelding skorar sitt annað mark þá er Skaginn nýbúinn að fá tvö mjög góð færi,“ sagði Lárus Orri.

„Gísli fékk tækifæri til að koma þeim í 2-1 og það hefði gefið þeim rosalega mikið,“ sagði Albert Brynjar Ingason, sérfræðingur Stúkunnar.

Þeir sýndu lista með þriggja marka töpum Skagamanna í sumar.

Þetta eru nokkur stór og slæm töp

„Þetta eru nokkur stór og slæm töp. Það sem við höfum verið að sjá í þessum leik og líka fyrr á tímabilinu er að þeir hætta. Þeir hálfpartinn gefast upp og maður sér það að það er áþreifanlegt á liðinu að trúin hverfur,“ sagði Lárus.

„Auðvitað fer sjálfstraustið þegar það gengur illa hjá liðum en þetta er búið að vera gríðarlega erfitt,“ sagði Lárus.

Skagaliðið er búið að fá á sig 28 mörk í 11 leikjum en liðið fékk á sig 31 mark í 22 fyrstu leikjunum í fyrra.

Það væri áhugavert

„Það á ekki að hafa komið neinum á óvart að það hafi verið farið í breytingar. Þetta verður erfitt fyrir Skagamenn en ég held að þetta hafi verið óumflýjanlegt,“ sagði Lárus.

„Erum við að fara að sjá Jóhannes Karl snúa aftur í Skagaliðið? Það eru háværar raddir um að það sé að fara að gerast,“ sagði Guðmundur.

„Jóhannes Karl er að þjálfa AB í Danmörku. Það væri áhugavert,“ sagði Guðmundur.

Það má horfa á viðbrögðin við spurningum Gumma Ben og alla umræðuna um þjálfaraskipti Skagamanna hér fyrir ofan.