Þrjú verk­efni fengu styrk úr sjóði Frum­kvöðla­Auðar

Í tilkynningu segir að meginmarkmið sjóðsins sé að efla frumkvæði og athafnasemi kvenna með því að styðja við framúrskarandi nýsköpunarverkefni. Í ár hafi borist yfir níutíu umsóknir og hafi þrjú verkefni verið valin til styrkveitingar að þessu sinni.

„Þau verkefni sem hlutu styrk árið 2025 eru:

• Anahí – Líftæknifyrirtæki sem hefur þróað húðvöru úr náttúrulegum innihaldsefnum byggða á vísindalegri þekkingu. Varan er sérstaklega ætluð til að styðja við líkamlegan og tilfinningalegan bata kvenna eftir brjóstakrabbameinsaðgerð.
• GRÆNT – Nýsköpunarverkefni sem byggir á nýtingu vallhumals (Achillea millefolium) sem bragðefnis í lífrænni matvælaframleiðslu. Markmiðið er að skapa nýja íslenska búgrein, blómaræktun til matvælaframleiðslu, með sjálfbærni, hreinleika og gæði að leiðarljósi.
• Oceans of Data – Nýsköpunarfyrirtæki sem þróar gagnaveitu fyrir sjávarútveginn. Lausnin safnar og birtir markaðsgögn í rauntíma með það að markmiði að efla gagnadrifna ákvörðunartöku og umbreyta viðskiptum með sjávarafurðir,“ segir í tilkynningunni.

Um FrumkvöðlaAuð segir að allt frá stofnun hafi sjóðurinn haft að markmiði að styðja við konur sem vilja láta til sín taka á sviði nýsköpunar og athafnastarfsemi. Með árlegum úthlutunum styrkja leggi sjóðurinn sitt af mörkum til að efla fjölbreytileika, nýsköpun og sjálfbærni í íslensku atvinnulífi.