Hyggst eftir­láta á annað hundrað börnum sínum Telegram-auðinn

„Þau eru öll börnin mín og verða með sömu réttindi! Ég vil ekki að þau tæti hvert annað í sundur þegar ég dey,“ segir Durov í samtali við franska blaðið Le Point.

Durov segir að hann sé skráður faðir sex barna með þremur mismunandi konum. Þessu til viðbótar segir hann að sæði úr sér – sem hann hafi gefið frjósemisstofu fyrir einhverjum árum síðan til að hjálpa félaga sínum – hafi verið nýtt til að frjóvga egg á annað hundrað kvenna í tólf mismunandi löndum.

Í frétt BBC segir að hinn rússneski Durov, sem er í sjálfskipaðri útlegð í Dúbaí, muni þó ekki veita börnum sínum aðgang að arfi sínum næstu þrjátíu árin.

„Ég vil að þau lifi venjulegu lífi, byggi sig sjálf upp, læri að treysta sjálfum sér, læri að skapa og verði ekki háð bankareikningi,“ segir Durov.

Hinn fertugi Durov segir að hann hafi gengið frá erfðaskrá núna þar sem vinna hans feli í sér áhættu og að hann eigi marga óvini.

Samskiptaforritið Telegram var stofnað árið 2013 og er sérstaklega vinsælt í Rússlandi. Forritið er þekkt fyrir dulkóðum skilaboða, en skráðir notendur Telegram eru nú um milljarður manna.

Durov hefur verið ákærður í Frakklandi þar sem hann var handtekinn á síðasta ári. Hann er sakaður um að hafa ekki gert nægar breytingar á forritinu til að draga úr skipulagðri glæpastarfsemi. Hann neitar sök í málinu og segir ásakanirnar „fráleitar“.

Durav býr nú í Sameinuðu arabísku furstadæmunum þar sem höfuðstöðvar Telegram er að finna.