Lífið samstarf

Reykjalundur hlýtur al­þjóð­lega gæða­vottun fyrir endurhæfingarþjónustu

Reykjalundur
Hér má sjá starfsfólk Reykjalundar fagna CARF-áfanganum.
Hér má sjá starfsfólk Reykjalundar fagna CARF-áfanganum.

Reykjalundur hefur fengið alþjóðlegu gæðavottunina CARF, sem staðfestir að stofnunin uppfylli ströng fagleg gæðaviðmið og vinni að stöðugum umbótum í starfseminni sem miði að því að auka gæði þjónustunnar við notendur.

„Við á Reykjalundi erum mjög stolt af þessari viðurkenningu. Innleiðingarferlið hefur staðið yfir í marga mánuði og lögðust starfsmenn á eitt að gera þessa ánægjulegu niðurstöðu mögulega," segir Pétur Magnússon, forstjóri Reykjalundar.

Við erum því ákaflega glöð að hafa fengið það staðfest að þjónustan sem við veitum sé með þeirri bestu sem gerist í heiminum. 

„Það er vel við hæfi að það sé formlega staðfest á 80 ára afmælisári Reykjalundar.“ 

Fyrst íslenskra heilbrigðisstofnana

Þetta er í fyrsta skipti sem íslensk heilbrigðisstofnun öðlast CARF gæðavottun. Reykjalundur fór nýlega í gegnum ítarlega úttekt þar sem 1.720 staðlar í starfseminni voru skoðaðir. CARF-vottunin staðfestir að Reykjalundur hefur gengist undir ítarlegt úttektarferli, þar sem metið er hvort starfsemin uppfylli fagleg og siðferðileg viðmið og alþjóðlega viðurkennda gæðastaðla sem miða að betri þjónustu fyrir notendur.

Niðurstaða úttektarinnar var sú að Reykjalundur öðlaðist vottun til þriggja ára, sem er besta mögulega niðurstaða.

Hvað er CARF?

CARF (Commission on Accreditation of Rehabilitation Facilities) er sjálfstæð, óháð samtök sem veita gæðavottun (faggildingu) fyrir heilbrigðis- og félagsþjónustuaðila, sérstaklega þá sem bjóða upp á endurhæfingu, heilsutengda þjónustu, geðheilbrigðisþjónustu, þjónustu við fatlað fólk og öldrunarþjónustu.

Reykjalundur er leiðandi í endurhæfingarþjónustu og stærsta endurhæfingarstofnun landsins. Þar fer fram alhliða endurhæfing sem miðar að bættum lífsgæðum, aukinni færni og sjálfsbjargargetu þeirra sem þangað leita. Á Reykjalundi fara um 1.300 einstaklingar í gegnum endurhæfingarmeðferð á ári hverju.

Heilsa


Mest lesið


Fleiri fréttir

Sjá meira


×

Mest lesið


Tarot dagsins

Dragðu spil og sjáðu hvaða spádóm það geymir.