Mikael mættur til Stokk­hólms að semja við Djurgården

Lesandi Expressen náði mynd af Mikael þegar hann lenti á Arlanda flugvellinum í Stokkhólmi í gærkvöldi.

Þar segir að Mikael sé að ganga frá samningi við Djurgården og eigi eftir að gangast undir læknisskoðun. Hann verði keyptur frá AGF fyrir rúmar tvær milljónir evra, eða um 285 milljónir íslenskra króna.

Mikael hefur verið lykilleikmaður í Árósum undanfarin ár, alls spilað 121 leik fyrir AGF, skorað 18 mörk og lagt upp jafnmörg. Þar áður var hann hjá Midtjylland og Vendsyssel í Danmörku og Excelsior Rotterdam í Niðurlöndum.

Mikael á 33 landsleiki að baki fyrir Íslands hönd og kom við sögu í báðum leikjunum gegn Skotlandi og Norður-Írlandi í upphafi mánaðar.

Djurgården situr um miðja deild í Svíþjóð þegar mótið er tæplega hálfnað, í níunda sæti eftir tólf umferðir.