Önnur góð Reykjavíkurferð hjá Þórsurum

Sigurinn skilar Þórsliðinu upp í sautján stig en liðið situr í fjórða sætinu á meðal Fjölnismenn eru í fallsæti.

Þórsurum líkar greinilega lífið í höfuðborginni því þeir unnu 4-1 sigur á Leikni í Breiðholtinu fyrr í sumar. Tveir leikir, sex stig og markatalan 9-1.

Að þessu sinni skoraði Ibrahima Balde tvívegis í fyrri hálfleiknum, fyrst á 6. mínútu og svo aftur á 42. mínútu. 

Þórsarar voru tveimur mörkum yfir í hálfleik og svo einum manni fleiri frá 62. mínútu þegar Snorri Þór Stefánsson, markvörður Fjölnis, var rekinn af velli með rautt spjald.

Hermann Helgi Rúnarsson skoraði þriðja markið fjórum mínútum síðar og úrslitin voru ráðin.

Balde var ekki hættur og innsiglaði þrennuna sína þegar hann skoraði fjórða markið á 78. mínútu. Hann er  nú kominn með fimm deildarmörk fyrir Þór í sumar.

Aron Ingi Magnússon átti lokaorðið þegar hann skoraði fimmta mark Akureyrarliðsins fimm mínútum fyrir leikslok.