Hverju breytir Lárus Orri hjá Skagaliðinu?

Jón Þór Hauksson var rekinn eftir 4-1 tap á móti Aftureldingu og Dean Martin stýrði liðinu í 3-0 tapi á móti Stjörnunni.

Síðan þá hefur Lárus Orri fengið viku til að undirbúa liðið fyrir leik á móti Vestramönnum. Ekki langur tíma þegar það þarf að taka mikið til.

„Fyrsti leikur hjá nýjum þjálfara, Lárusi Orra, eftir góða æfingaviku,“ segir á miðlum Skagamanna.

Vestri hefur gert frábæra hluti í Bestu deildinni og Mjólkurbikarnum í sumar. Liðið er í fimmta sæti og í undanúrslitum bikarsins. Djúpmenn hafa unnið fjóra af sex heimaleikjum sínum í sumar og einu liðin sem hafa farið í burtu með stig frá Ísafirði í sumar eru topplið Víkings og Blika. Þau unnu bæði nauma 1-0 sigra.

Skagamenn hafa tapað þremur leikjum í röð en síðasti sigurleikur liðsins var á móti Íslandsmeisturum Breiðabliks á Kópavogsvellinum í lok maí.

Skagaliðið situr í botnsæti deildarinnar og þarf að vinna fimm marka sigur í dag til að losna þaðan. Þeir eru þremur stigum og fimm mörkum á eftir KA sem er í ellefta sætinu.

Þetta er fyrsti meistaraflokksleikurinn sem Lárus Orri þjálfari síðan 22. september 2018 þegar Þórsarar unnu 3-1 sigur á Leikni. Hann stýrði Þórsliðinu til sigurs í þremur síðustu deildarleikjunum en síðan eru liðin næstum því sjö ár.

Leikur Vestra og ÍA hefst klukkan 17.00 og verður sýndur beint á SÝN Sport Ísland 2. Útsendingin fer í loftið klukkan 16.50.