Leggur til þjóðar­at­kvæða­greiðslu um bókun 35

Ekkert samkomulag liggur enn fyrir um þinglok en stjórnarandstaðan á þingi hefur haldið uppi málþófi um veiðigjaldafrumvarp ríkisstjórnarinnar undanfarna daga og vikur. Áður hafði hún reynt að þæfa umræður um svonefnda bókun 35.

Í aðsendri grein Elliða Vignissonar, bæjarstjóra í Ölfusi, sem birtist á Vísi í dag fer hann yfir þráteflið á þingi og helstu deilumálin, þar á meðal veiðigjöldin, strandveiðar og lífeyrismál. Þar segir hann bókun 35 eitt versta málið sem liggi fyrir þingi „fyrir okkur mörgum“. Með samþykkt þess yrðu erlend lög rétthærri á Íslandi en innlend.

„Lausnin í þessu máli kann að liggja í því að kosið verði um bókun 35 samhliða þjóðaratkvæði um ESB. Þetta er ekki bara spurning um leið að þinglokum, heldur um að treysta íslensku þjóðinni til að taka upplýsta ákvörðun um framtíð landsins og sætta sjónarmið,“ skrifar Elliði.

Ríkisstjórnin hefur boðað þjóðaratkvæðagreiðslu um hvort taka eigi aðildarumsókn Íslands að Evrópusambandinu upp aftur fyrir árið 2027.

Aðeins fimmtungur svarenda skoðanakönnunar Maskínu sagðist þekkja vel til bókunar 35 í síðasta mánuði, jafnmargir og sögðust ekkert þekkja til hennar. Þriðjungur til viðbóitar sagðist þekkja illa til efnis hennar.

Fjallar um forgang Evrópureglna sem eru orðnar íslenskar

Bókun 35 vísar til hluta EES-samningsins. Hún snýst um að tryggja stöðu evrópskra reglna sem Ísland hefur leitt inn í lög í gegnum EES-samninginn gagvart öðrum landslögum. Eftirlitsstofnun EFTA hefur haft innleiðingu og framkvæmd bóknunarinnar til skoðunar frá 2011 og komst að þeirri niðurstöðu árið 2020 að hún væri ekki í samræmi við EES-samninginn.

Frumvarpi utanríkisráðherra er ætlað að taka af tvímæli um þau tilfelli þar sem ákvæði EES-reglna sem hafa verið teknar upp í íslensk lög stangast á við önnur íslensk lög þannig að skýrt sé að lögin sem innleiddu EES-reglurnar hafi forgang nema Alþingi ákveði annað.

Þrátt fyrir að frumvarpið fjalli í raun um forgangsröðun mismunandi íslenskra lagabálka halda andstæðingar bókunar 35 því fram að hún grafi undan fullveldi Íslands með því að láta erlend lög hafa forgang yfir íslensk lög.