Segir stjórnina ekki standa við stóru orðin í orku­málum

Fyrstu línur ríkisstjórnarflokkanna í orkumálum birtast núna í tillögu sem liggur fyrir Alþingi frá meirihlutanum í umhverfis- og samgöngunefnd um hvernig eigi að flokka fimm virkjanakosti í vatnsafli.

Þar er lagt til að Héraðsvötn í Skagafirði fari í vernd, Kjalölduveita og Urriðafoss í bið en Skrokköldu- og Holtavirkjun fari í nýtingu. Í samanlögðum gígavattsstundum þýddi þetta að 22 prósent mætti nýta, 47 prósent færu í bið en 31 prósent í vernd.

Í fréttum Sýnar segir Jens Garðar Helgason, varaformaður Sjálfstæðisflokksins, orkuspá Landsnets gera ráð fyrir að 5.000 gígavattsstundir þurfi í viðbót fyrir árið 2035. Núna séu á teikniborðinu hjá Landsvirkjun 2.110 gígavattsstundir í fimm virkjanakostum.

Af 3.500 gígavattsstundum í rammaáætlun núna ætli stjórnarflokkanir einungis að nýta 760 gígavattsstundir.

„Og bara orkuspá Landsnets segir að fyrir árið 2035 þurfi fimmþúsund gígavattsstundir. Þannig að þetta gengur ekki upp,“ segir Jens Garðar.

Jóhann Páll Jóhannsson, ráðherra orku- og umhverfismála, boðar hins vegar tvær nýjar rammaáætlanir á næsta löggjafarþingi. Þar verði fjallað um tvo vatnsaflskosti á Vestfjörðum, vatnsaflskost á Austurlandi, jarðhitakost á Hellisheiði auk þess sem hann hafi í gær tilkynnt um samráðsferli 350 gígavattsstunda vindorkukosts í Garpsdal við Gilsfjörð.

„Þannig að það er gríðarlega mikið í gangi. Það eru auðvitað mörg verkefni nú þegar í orkunýtingarflokki rammaáætlunar,“ segir Jóhann Páll.

„Við erum þá bara að halda áfram að vera hér í viðvarandi orkuskorti ef við tökum ekki alvarlega á þessum málum.

Og við sjálfstæðismenn höfum lagt það til að allir þeir kostir sem voru núna inni í rammanum, þessir fimm virkjanakostir, fari allir í nýtingu,“ segir Jens Garðar.

„Það er svolítið talað um þessa rammaáætlun, sem er núna fyrir þingi, eins og hún marki upphaf og endi orkuöflunar á næstu árum. Það er ekki þannig.

Við erum að fara að klára nýja rammaáætlun á hverju einasta ári á þessu löggjafarþingi. Við erum að fara að bæta í orkunýtingarflokkinn á hverju einasta ári til þess að tryggja að það sé nægt framboð af orku í landinu,“ segir ráðherrann.

„Það er talað um að það eigi að fara hér í stórkostlega orkuuppbyggingu. Svo erum við með fimm stóra og flotta orkukosti sem eru gríðarlega mikilvægir. Og það eru einungis tveir minnstu kostirnir af fimm, 760 gígavattsstundir af 3.517. 

Það segir sig sjálft. Það er ekki verið að standa við stóru orðin,“ segir Jens Garðar í frétt Sýnar, sem sjá má hér: