Kort: Sprungan lengist til norðurs

Veðurstofa Íslands hefur gefið út uppfært hættumatskort sem gildir til 18. júlí kl. 15 nema breyting verði á virkni. Viðvörunarstig eldstöðvakerfisins er áfram á hæsta stigi: þremur.  Hættumatið byggir á nýjustu mælingum, að því er fram kemur í tilkynningu Veðurstofunnar.

Stofnunin segir að gossprungan hafi lengst og nái lengra til norðurs en fyrri gossprungur síðan desember 2023. Hraunflæði heldur áfram en hefur dregist saman.

Mesta hraunið safnast austan megin og líklegt er að það fylli lægðir á svæðinu. Jarðskjálftavirkni hefur minnkað verulega og mælast nú aðeins fáeinir smáskjálftar á klukkustund. Mengun frá gasútstreymi og gróðureldum er viðvarandi.

Eldgosið á Sundhnúksgígaröðinni heldur áfram en samkvæmt mælingum á gosóróa hefur dregið úr krafti þess síðan í morgun, segir Veðurstofan.