„Lít niður á alla þessa dópista sem mér er meint að hafa selt vopn“

Ísidór Nathansson, sem var annar sakborninga í hryðjuverkamálinu svokallaða, var gestur í Bjórkastinu, sem er á vegum Brotkasts. Ísidór og Sindri Snær Birgisson voru sýknaðir af ákæru um að undirbúa hryðjuverk en héraðsdómur sakfelldi þá báða fyrir vopnalagabrot. Málinu hefur verið áfrýjað til Hæstaréttar. 

Eins og nafn hlaðvarpsins gefur til kynna eru veigar oft við hendi í þáttunum. Í hlaðvarpsþættinum talar Ísidór opinskátt um málið, sem hann hlaut 15 mánaða fangelsisdóm fyrir, en hann ræðir einnig um stjórnmálaskoðanir.

„Fasistar eða hvað sem þú vilt kalla mig“ fengið á sig slæmt orðspor  

Ertu hægri öfgamaður? 

„Já,“ svarar Ísidór og beðinn um að útskýra nánar segir hann: „Ég hef til dæmis ekki mikla trú á lýðræði.“

Seinna í þættinum minnist hann samskipta sinna við sálfræðing sinn í fangelsi. 

„Hann sem svona sálfræðingur hélt virkilega að hann gæti leikið á mig og verið með einhver undirhandabrögð. Hann vissi náttúrulega mínar meintu skoðanir. Þú finnur sjaldan hóp... fasista eða hvað sem þú vilt kalla mig, sem er með jafn margar fyrirfram stimplaðar [skoðanir]. Hann ákveður bara hvað mér finnst,“ segir hann. 

„Áður en að þessi gaur [sálfræðingurinn] vissi það að bróðir ömmu minnar væri einn af samtökunum 76 [svo] eða svoleiðis — hann var meira að segja með eitthvað furðulegt nafn, Kíkí eða svoleiðis — hann var frumkvöðull í úrkynhneigð á [óskiljanlegt]. Þegar ég nefndi þetta var hann að covera fyrir þetta vegna þess að hann leit á þetta út frá minni meintu andúð á samkynhneigðum,“ bætir hann við og einn þáttastjórnandi skýtur inn í: „Það eru fordómar.“ 

Ekki vopnasalinn sem hleypir af byssunni 

Þá ræðir Ísidór einnig vopnaframleiðslu þeirra tvímenninga í hryðjuverkamálinu, talar um að hafa tekið þátt í framleiðslu og breytingum á skotvopnum, m.a. með 3D-prentun. Ísidór segir að þetta hafi byrjað sem tæknilegt áhugamál en þróast yfir í framleiðslu og sölu.

„Ég sem öfgasinnaður og allt þetta... ég lít niður á alla þessa dópista sem mér er meint að hafa selt vopn,“ segir hann. 

„Allar þessar skotárásir sem hafa farið fram með þessum þrívíddaprentuðu vopnum,  það er ekki hægt að kenna okkur um þetta. Eins og margir frjálshyggjumenn skilja þá er ekki hægt að kenna vopnaframleiðandanum um hver notar vopnin. Ég er ekki að afsaka afleiðingar af neinu en ég er ekki að segja það að ég eigi beinan þátt í því sem fór fram,“ bætir hann við en óljóst er til hvers hann vísar.

Ísidór viðurkennir að hafa breytt Colt M4 rifli í hálfsjálfvirkt vopn. „Ein af ástæðunum af hverju við héldum okkur við þetta áhugamál er að samkvæmt íslenskri löggjöf er þetta bara sekt,“ sagði hann. 

En þeir fara um víðan völl fjórmenningarnir í Bjórkastinu og ræddu meðal annars mál Jeffery Epstein og „Júðabrúðuna“ Donald Trump Bandaríkjaforseta, eins og Ísidór kallar hana. Þeir ræddu kynferðisofbeldi, samkynhneigð, heimilisofbeldi, stöðu drengja í íslensku samfélagi, hneykslismál innan nýrrar forystu Sósíalistaflokksins svo einhver dæmi um umræðuefni séu nefnd.