„Það verða færi og bæði lið þurfa að vera klók“

Besta deildin er búin að vera í fríi síðan þann 21. júní síðastliðinn og Þórdís skellti sér í stutt sumarfrí til Króatíu.

„Maður leyfði sér að fara í frí þegar maður fór í frí, skildi fótboltann svolítið eftir. Æfði samt vel í fríinu og svo þegar maður kemur til baka verður maður strax spenntur.

Mér finnst eiginlega bara góður plús að fá strax þennan leik eftir frí“ segir Þórdís eftir fríið og fyrir toppslaginn gegn Breiðabliki í kvöld.

Breiðablik og Þróttur eru í efstu sætum Bestu deildarinnar með 25 stig. Liðin gerðu hádramatískt 2-2 jafntefli síðast þegar þau mættust og von er á öðrum hörkuleik á Kópavogsvelli í kvöld.

Æfðu af krafti og eru klárar í slaginn eftir sumarfrí

„Við æfðum kröftuglega eftir fríið og svo erum við búnar að setja einbeitinguna í næsta leik og hvernig við ætlum að spila. Við erum komnar með nýjan leikmann [Kaylu Robbins] og búnar að missa Caroline [Murray] en við höfum æft vel og erum tilbúnar“ segir Þórdís einnig.

Bæði lið þurfa að vera klók

Eftir að hafa æft af krafti og með nýjan framherja tilbúinn til átaka er Þórdís orðin spennt fyrir toppslagnum.

„Það er mikil spenna eftir seinasta leik á móti þeim, við vitum hvað við getum gert. Ég býst bara við nákvæmlega sama krafti og síðast, tvö lið sem munu reyna að klára leikinn. Það verða færi og bæði lið þurfa að vera klók, það er enginn að fara auðveldlega í gegnum þennan leik.“

Breiðablik tekur á móti Þrótti í toppslag Bestu deildar kvenna á Kópavogsvelli klukkan sjö í kvöld. Leikurinn verður í beinni útsendingu á Sýn Sport, upphitun hefst stundarfjórðung fyrir sjö.