Enn gýs úr einum megingíg og virknin nokkuð stöðug

Þetta kemur fram í tilkynningu frá Veðurstofunni. Þar segir að á miðnætti hafi rofað til á Reykjanesi þannig að aftur sást til gossins.

Veðurstofa vill ítreka hættuna af því að ganga á nýlegu hrauni, þar sem einungis nokkrir sentímetrar geta skilið á milli harðs hraunyfirborðs og fljótandi hrauns.

Suðlæg átt mun ríkja á gosstöðvunum í dag og því má gera ráð fyrir að gas frá eldgosinu berist yfir Voga og inn á Faxaflóa. Ekki hefur mælst mikil gasmengun í byggð í nótt en gosmóða mældist víða á Suðurlandi í gærkvöldi.

Fylgjast má með stöðu mála á loftgæði.is.