Minntust fórnar­lambanna í Híró­síma

Shigeru Ishiba, forsætisráðherra Japans, sótti athöfnina ásamt fulltrúa frá fjölda erlendra ríkja að því er segir í frétt BBC.

„Japan er eina þjóðin sem hefur þurft að þola kjarnorkusprengju í stríði,“ sagði Kazumi Matsui, borgarstjóri Hírósíma við athöfnina í Minningargarðinum um frið þar sem hún fór fram. „Japanska ríkisstjórnin er fulltrúi fólks sem sækist eftir sönnum og varanlegum friði.“

Bandaríkjamenn vörpuðu tveimur kjarnorkusprengjum á Japan undir lok seinni heimstyrjaldarinnar – í Hírósíma 6. ágúst 1945 og Nagasaki þremur dögum síðar. Japanir gáfust upp í kjölfar sprenginganna sem batt enda á heimstyrjöldina.

Áætlað er að um 200 þúsund manns hafi týnt lífi vegna sprenginganna – sumir í sprengingunni sjálfri og aðrir sökum veikinda af völdum geislavirkni eða brunasára.

Í ræðu sinni vék borgarstjórinn Matsui einnig að aukinni hervæðingu og þeirri nálgun að „kjarnorkusprengjur væru nauðsynlegar fyrir þjóðaröryggi“. „Þessi þróun virðir þann lærdóm sem alþjóðasamfélagið hefði átt að draga af harmleikum sögunnar hneykslanlega að vettugi. Hún ógnar þeim ramma að friði sem svo margir hafa unnið að.“

Fórnarlamba kjarnorkusprenginganna verður áfram minnst víða um heim í dag. Þannig fer fram kertafleyting við suðvesturenda Reykjavíkurtjarnar klukkan 22:30 í kvöld. Fyrr um daginn, milli 15 og 17, mun fara fram málþing um kjarnorkuárásirnar í Ráðhúsi Reykjavíkur þar sem Guðni Th. Jóhannesson, fyrrverandi forseti, mun halda erindi.