Ómótstæðileg ítölsk steikarloka úr smiðju Hildar Rutar

Svava Marín Óskarsdóttir skrifar 20. ágúst 2025 14:01

Þó svo að ágústmánuður sé að líða undir lok er enn heitt í veðri og því kjörið að kveikja á grillinu og bjóða góðum gestum í mat. Matgæðingurinn Hildur Rut Ingimarsdóttir deildi uppskrift að ljúffengum ítalskum steikarsamlokum sem gætu auðveldlega ratað á matseðil ítalsks veitingahúss.

Hildur Rut deilir reglulega girnilegum uppskriftum með fylgjendum sínum á Instagram og á uppskriftarsíðunni Gerum daginn girnilegan.

Hráefni

3 stk mínútusteikur. U.þ.b. 400–450 g samtals.
Ólífuolía til steikingar
Salt og pipar
2 stk laukar
Smjör til steikingar, u.þ.b. 50 g.
8 stk sneiðar af góðu súrdeigsbrauði eða ciabatta
1 stk Aarrabiata sósa frá Filippo Berio. 1-2 msk á hverja sneið.
Rifinn parmesan ostur
2 stk burrata kúlur
Klettasalat
120 g kirsuberjatómatar, skornir í tvennt
Fersk basilika

Leiðbeiningar

Kryddið mínútusteikurnar með salti og pipar og steikið á heitri pönnu í smá ólífuolíu – rétt undir einni mínútu á hvorri hlið, eða þar til þær eru fullkomlega eldaðar, eftir þykkt. Látið hvíla og skerið í þunnar sneiðar.
Sneiðið laukinn og steikið á vægum hita upp úr smjöri í 10 -15 mínútur,eða þar til hann verður mjúkur og gylltur.
Steikið brauðsneiðarnar á báðum hliðum upp úr smjöri á pönnu þar til þær verða gullinbrúnar og stökkar að utan.
Raðið brauðinu á bökunarpappír á ofnplötu. Smyrjið með arrabiata sósu, stráið parmesanosti yfir og dreifið smjörsteiktum lauk ofan á.
Bakið í ofni við 200°C í um 8–10 mínútur, þar til brauðið er heitt og osturinn aðeins farinn að bráðna.
Takið úr ofni og toppið með rifnum burrata (1/4 kúla á hverja sneið), klettasalati, nautakjöti, tómötum og ferskri basiliku.
Berið fram strax – þá helst með góðu víni og fólki sem kann að meta steik í samlokuformi.