Al­þjóða­kerfinu ekki við­bjargandi og þörf á að­lögun

Skýrslan á að fjalla um helstu áskoranir sambandsins á næstu árum en í drögum hennar segir að alþjóðlegar stofnanir eins og stofnanir innan Sameinuðu þjóðanna og Alþjóðaviðskiptastofnunin, svo eitthvað sé nefnt, muni ekki koma óskaddaðar frá næstu árum og mögulega sé þeim ekki viðbjargandi.

Það sé að miklu leyti vegna Donalds Trump, forseta Bandaríkjanna, sem hafi slitið Bandaríkin frá nokkrum slíkum stofnunum og dregið úr fjárveitingum til þeirra. Þá hafi tollar Trumps einnig grafið verulega undan því alþjóðakerfi sem þekkst hefur undanfarna áratugi.

Þetta kemur fram í grein Politico en blaðamenn miðilsins hafa komið höndum yfir drög að skýrslunni. Í greininni segir að lokaskýrslan gæti veri töluvert öðruvísi en drögin.

Megi ekki óttast ný bandalög

Í drögunum segir að breytingarnar gætu haft mikil áhrif á ESB þar sem mörg af kerfum sambandsins byggi á alþjóðakerfinu og viðskiptaháttum undanfarinna ára.

„Óstöðugleiki og truflanir á alþjóðakerfinu í samblandi við brestum í hagkerfum heims hafa neikvæð áhrif á getu ESB til að vinna í hag efnahags og íbúa sambandsins,“ segir í drögunum.

Sjá einnig: Ís­land enn friðsælast í sí­fellt versnandi heimi

Í drögum skýrslunnar segir að Evrópa þurfi að aðlagast og leiðtogar heimsálfunnar megi ekki vera hræddir við að gera ný bandalög í samræmi við sameiginlega hagsmuni. Þá þurfi gæti Evrópa jafnvel tekið leiðandi hlutverk í að skapa nýtt alþjóðakerfi.

Sérstaka áherslu ætti að leggja á stofnanir eins og Sameinuðu þjóðirnar og Alþjóðaviðskiptastofnunina.

Ríki Evrópu þurfa einnig, samkvæmt drögunum, að vera undirbúin fyrir tækninýjungar eins og gervigreind og námuvinnslu í geimnum og á hafsbotni. Umræða um reglugerðir fyrir slíkar nýjungar þurfi að eiga sér stað.