Ást­rós Trausta, John Legend og Bæjarins Beztu í Kjós

Ástrós birti mynd af sér ásamt nígerísku hjónunum á Instagram í gær en Otedola og Oluwole Ajibade hafa verið gift í tæplega tvö ár og hafa haldið þrjár brúðkaupsveislur, nú síðast á Íslandi.

Otedola er 29 ára leikkona og hefur leikið í nígerískum kvikmyndum á borð við Citation, sem er dreift af Netflix, og Ms. Kanyin, sem er dreift af Amazon Prime. Hún er dóttir Femi Otedola, nígerísks olíubaróns, sem er í 2.566. sæti á lista Forbes yfir ríkustu menn heims. Eignir auðkýfingsins eru metnar á 1,3 milljarða Bandaríkjadala, sem jafngildir um 160 milljörðum króna.

Brúðguminn, Oluwatosin Oluwole Ajibade, sem er talsvert þekktari undir nafninu Mr Eazi, er tónlistarmaður og hefur starfað með listamönnum á borð við Bad Bunny og J Balvin.

Eazi og Otedola kynntust á köldum degi í janúar 2017 á skemmtistaðnum Tate Club í London, þar sem þau voru bæði mætt til að hlusta á systur hennar, Florence, þeyta skífum. Árið 2022 greindu hjónin frá því í hlaðvarpsþætti þeirra, How Far?, að þau hefðu trúlofað sig í Dúbaí. 

Sjá: Nígerískt stjörnubrúðkaup í Hallgrímskirkju

Nú, þremur árum síðar, eru þau gift og hafa haldið brúðkaupsveislur í þremur mismunandi löndum á árinu: Mónakó, Dúbaí og Íslandi.

Dolfallin og orðlaus

Ástrós og Adam kynntust Eazi og Otedola þegar þau voru í fríi hér á landi og fóru með þau út að borða. Þau voru gestir í tveimur af brúðkaupum hjónanna, í Dúbaí fyrr í sumar og á Íslandi í ágúst. 

Ástrós birti í gær fallega mynd af þeim hjónum ásamt hjónunum, þar sem þau klæddust öll nígerískum brúðkaupsklæðnaði í brúðkaupinu í Dúbaí. „Ég er enn dolfallin og orðlaus eftir að hafa fagnað þessum töfrandi degi og hreinu ást. Elska ykkur endalaust,“ skrifar Ástrós við myndafærsluna.

Í nígerískum brúðkaupum er hefð fyrir því að gestir klæðist samskonar fötum og brúðhjónin. Þessi föt kallast aso-ebi, sem þýðir bókstaflega „fjölskylduföt“. Með þeim skapa gestirnir samheldna og hátíðlega stemningu í brúðkaupinu.

Heltekin af Íslandi

Brúðkaupið vakti athygli erlendis, meðal annars í bandaríska tímaritinu Vogue en ætla má að brúðkaupið sé eitt það umfangsmesta sem hefur verið haldið hér á landi. Um hundruð gesta frá öllum heimshornum og tökuteymi Netflix voru viðstaddir herlegheitin.

„Eazi og ég höfum alltaf farið okkar eigin leið,“ sagði Otedola í viðtalinu um brúðkaupssumarið mikla og að Ísland sé uppáhaldsstaðurinn þeirra í heiminum. 

Brúðkaupið sjálft fór fram í Hallgrímskirkju og veislan var haldin í stórkostlegu glerhýsi í Kleif í Kjós, sem var reist sérstaklega fyrir brúðkaupið. Umgjörðin var afar glæsileg þar sem íslensk náttúra var í aðalhlutverki.

Gestum var boðið upp á veitingar frá veitingastaðnum Oto, uppáhaldsstað hjónanna. 

„Við höfðum bara uppáhaldsréttina okkar – meðal annars Hokkaido-brauð, rauðrófugyoza, agnolotti og kremaða polentu – sem var borið fram jafn óðum,“ segir Otedola um matseðilinn. 

Brúðguminn kom sinni heittelskuðu á óvart með því að fá tónlistarmanninn John Legend til að spila í veislunni. 

Um kvöldið héldu gestirnir aftur inn í miðborg Reykjavíkur, á næturklúbbinn Sunset í kjallara Edition, þar sem þeir skemmtu sér langt fram eftir kvöldi.

SS pylsur og dansandi norðurljós

Daginn eftir héldu gestirnir í böðin í Hvammsvík, þar sem þeir slökuðu á í fallegu umhverfi á meðan plötusnúðurinn Michael Brun spilaði fram eftir kvöldi.

Gestirnir fengu að smakka fjölbreytta rétti frá nokkrum af uppáhaldsveitingastöðum hjónanna, á meðan norðurljósin skörtuðu sínu fegursta.

„Við fengum uppáhaldsmatarmarkaðsveitingahúsin okkar til að setja upp básana sína, allt frá burrata-pistachio pizzu til besta butter chicken í Evrópu. Og svo má ekki gleyma goðsagnakenndu pylsunum frá Bæjarins Beztu, sem hefur verið íslenskt must do frá árinu 1937,“ sagði Eazi í viðtalinu við Vogue.

Viðtalið við brúðhjónin má lesa í heild sinni á vef Vogue.