Björg­vin Brimi í Víking

Björgvin er yngri bróðir Benónýs Breka, leikmanns Stockport County á Englandi, sem á markametið í efstu deild á Íslandi. Björgvin skrifaði undir fjögurra ára samning við Víking.

Björgvin er uppalinn hjá Gróttu en lék tvo leiki með KR í Bestu deildinni í fyrra. Á nýafstöðnu tímabili skoraði hann átta mörk í tuttugu leikjum fyrir Gróttu í 2. deildinni. Seltirningar enduðu í 2. sæti og endurheimtu sæti sitt í Lengjudeildinni.

Víkingur varð Íslandsmeistari í þriðja sinn á síðustu fimm árum og í áttunda sinn alls á sunnudaginn. Víkingar unnu þá FH-inga, 2-0, á heimavelli.

„Björgvin Brimi er spennandi leikmaður sem við höfum verið að fylgjast með. Hann er snöggur, teknískur og getur leyst fleiri en eina stöðu. Við hlökkum til að fylgast með honum í Víkingstreyjunni og þróa hann sem leikmann. Hann er með alla burði til að verða frábær leikmaður fyrir Víking,“ sagði Kári Árnason, yfirmaður knattspyrnumála hjá Víkingi, um nýjasta leikmann félagsins.