Dómur þyngdur yfir nauðgara Pelicot

Hinn franski Dominique Pelicot, fyrrverandi eiginmaður Gisele Pelicot, var dæmdur í tuttugu ára fangelsi í fyrra fyrir að hafa á níu ára tímabili byrlað eiginkonu sinni ólyfjan, nauðgað og leyft tugum manna að nauðga henni og tekið ódæðin upp. 

Husamettin Dogan var meðal tæplega fimmtíu manna sem voru dæmdir sekir í málinu. Þeir voru dæmdir í þriggja til fimmtán ára fangelsi. Sautján þeirra höfðu hug á að áfrýja í málinu en hættu við, allir nema Dogan. 

Áfrýjunardómstóll í Nimes í Frakklandi kvað upp dóm í dag þar sem refsing yfir Dogan var þyngd, að því er kemur fram í umfjöllun Guardian.

Kviðdómur skipaður fimm karlmönnum og fjórum konum auk þriggja dómara dæmdi Dogan sekan fyrir að hafa nauðgað Pelicot í svefnherbergi hjónanna aðfaranótt 29. júní 2019. 

Við málsmeðferð var fjallað um netsamskipti Dogan og Dominique Pelicot á spjallþræði að nafni „Án hennar vitundar“. Á þræðinum óskaði sá síðarnefndi eftir mönnum til þess að nauðga eiginkonu sinni eftir að hann hafði byrlað henni ólyfjan. 

Sem fyrr segir var refsing yfir manninum þyngd um eitt ár, úr níu í tíu. Dominique Sie ríkissaksóknari í Frakklandi hafði þó barist fyrir því að refsing hans yrði þyngd um þrjú ár, þar sem hann „neitaði að taka nokkra ábyrgð“ á gjörðum sínum.