Hefur á­hyggjur af stöðu Sýnar og boðar fjöl­miðla til sam­ráðs

Minnihluti nefndarinnar hefur lagst gegn lækkun hlutfalls endurgreiðslustuðnings við einkarekna fjölmiðla og segir frumvarpið, sem lagt var fram af Loga, senda þau skilaboð að fjölmiðlum hefnist fyrir að gagnrýna ríkisstjórnina. Ráðherra leggur til með frumvarpinu að hámark styrkja verði lækkað úr 25 prósentum í 22 sem hefur áhrif á miðla tveggja fyrirtækja: Sýnar og Árvakurs.

„Það er bara ómálefnalegt og ósmekklegt að stilla þessu upp með þessum hætti. Ég útskýrði hvað lá til grundvallar þegar ég lagði þetta fram í febrúar, það var í rauninni verið að dreifa styrknum meira. Þetta er vissulega upphæð upp á kannski fimmtán milljónir fyrir tvo af fjölmiðlunum en þetta er ekki afgerandi hlutur í stóra samhenginu,“ sagði Logi í samtali við fréttastofu að loknum ríkisstjórnarfundi í morgun. 

Erlend samkeppni mjög flókin

Hann segir vandamálið sem blasi við vera það að fjölmiðlar hafi undanfarin ár verið í erfiðri stöðu og það batni ekki. 

„Þeir eru í mikilli samkeppni við erlendar streymisveitur, sem hafa 50 prósent hlutdeild hér á markaði á meðan aðeins 15 prósent Íslendinga borgar fyrir fréttaþjónustu. Við þurfum að ráðast í stórar aðgerðir gagnvart erlendri samkeppni, bæta rekstrarskilyrði innlendrar fjölmiðlunar og fara í aðgerðir til að rétta stöðu þessara frjálsu miðla gagnvart RÚV.“

Sigurjón Þórðarson þingmaður Flokks fólksins hvatti til þess í vor að styrkir til Morgunblaðsins yrðu endurskoðaðir, eftir að miðillinn fjallaði mikið um flokkinn í byrjun árs. Logi fordæmir þetta.

„Ég hef fordæmt slík ummæli. Stjórnmálafólk á almennt að sjá hag af því að hér séu aðhaldssamir fjölmiðlar sem gegni lýðræðishlutverkinu og sýni stjórnvöldum aðhald. Ég fagna slíku. Ég hef ekki tekið undir þessi ummæli, þvert á móti hef ég sagt að þau eru ósmekkleg,“ segir Logi. 

Hefur áhyggjur

Hann segir nýjustu fregnir, af afkomuviðvörun Sýnar, hvetja ríkisstjórnina til að ganga rösklega til verks. 

Ertu að fylgjast með málinu? Hefurðu áhyggjur? 

„Já, auðvitað hef ég áhyggjur. Þetta er grafalvarlegt og þetta sýnir í hvaða stöðu mikilvægir fjölmiðlar á Íslandi eru. Þetta mun hvetja okkur til að ganga kannski hraðar til verks en við ætluðum. Við ætluðum að taka okkur tíma í þetta. Við munum birtast með tillögur strax í nóvember varðandi RÚV og fleiri,“ segir Logi.

„Við ætlum að kalla fjölmiðlana til samráðs og leyfa þeim að sjá á spilin og kalla eftir hugmyndum frá þeim og viðbrögðum við því sem við erum að velta fyrir okkur. Ég held að það skipti máli að taka á þessari stóru mynd en týnum okkur ekki í smáatriðunum.“

Vísir er í eigu Sýnar.