Skipti bús Magnúsar tekin upp sex­tán árum frá þroti

Í auglýsingu sem birt var í Lögbirtingablaðinu í gær segir að með úrskurði Héraðsdóms Norðurlands eystra uppkveðnum 4. maí 2009, hafi bú Magnúsar Þorsteinssonar verið tekið til gjaldþrotaskipta. Skiptum hafi lokið þann 20. mars 2017.

Skiptin hafi nú verið endurupptekin samkvæmt ákvæði laga um gjaldþrotaskipti og fleira um endurupptöku.

Andmælafrestur til 3. nóvember

Þar segir að hafi skiptum verið lokið án tillits til eignar sem búið gat þá ekki ráðið yfir skuli skiptastjóri tafarlaust og ótilkvaddur taka skiptin upp á ný ef eignin stendur búinu til ráðstöfunar. Þegar henni hafi eftir atvikum verið komið í verð skuli skiptastjóri gera frumvarp til viðbótarúthlutunar.

Í auglýsingunni segir að skiptafundur til að fjalla um frumvarp að viðbótarúthlutunargerð úr búinu verði haldinn á skrifstofu skiptastjóra þann 3. nóvember.

Komi ekki í síðasta lagi á þeim fundi fram andmæli við frumvarpinu muni það lagt óbreytt til grundvallar sem úthlutunargerð. Frumvarp að viðbótarúthlutunargerð muni liggja frammi á skrifstofu skiptastjóra síðustu tvær vikurnar fyrir skiptafundinn.

Getur ekkert sagt

Sigmundur Guðmundsson, skiptastjóri þrotabúsins, segir í samtali við Vísi að hann geti ekkert sagt til um ástæður þess að skiptin voru tekin upp. Það muni hann í fyrsta lagi geta gert eftir skiptafundinn.

Skiptin tóku upphaflega tæplega átta ár og samþykktar kröfur í þrotabúið námu alls 24,5 milljörðum.

Straumur-Burðarás fjárfestingarbanki krafðist þess að bú Magnúsar yrði tekið til gjaldþrotaskipta. Ástæðan fyrir gjaldþrotakröfunni var sú að fjárfestingafélagið BOM ehf tók tæplega tólf hundruð milljón króna lán til þess að kaupa hlut í Icelandic Group. Lánið var veitt árið 2005.

Upprunalegir lántakendur voru þeir Baldur Guðnason og Steingrímur H. Pétursson, eigendur Sjafnar. Árið 2007 keypti Magnús BOM og skrifaði undir sjálfskuldarábyrgð upp á 930 milljónir króna.

Athygli vakti að Magnús breytti um lögheimili rétt áður en mál hans var dómtekið á Akureyri og fluttist til Rússlands. Þvertók hann þó fyrir að tengsl væru á milli þess og dómsmálsins.

Magnús var áberandi í viðskiptalífinu hér á landi á árunum fyrir hrun. Magnús var stjórnarformaður og aðaleigandi Avion Group sem átti meðal annars Air Atlanta. Þá keypti hann Landsbankann ásamt Björgólfi Guðmundssyni og Björgólfi Thor Björgúlfssyni.