Hlupu inn á Formúlu 1-brautina: „Ég hefði getað drepið þá“

Óskar Ófeigur Jónsson skrifar 27. október 2025 07:32

Liam Lawson sá allt í einu menn hlaupa yfir brautuna fyrir framan sig. Getty/ Rudy Carezzevoli

Mjög óhuggulegt atvik varð í Mexíkókappakstrinum í Formúlu 1 í gær og upp komu aðstæður sem hefðu getað endað með hryllilegum hætti.

Liam Lawson, ökumaður Racing Bulls, sá allt í einu tvo starfsmenn keppninnar hlaupa yfir brautina fyrir framan bílinn sinn.

Lawson er 23 ára gamall Nýsjálendingur sem hefur verið að keppa í formúlu 1 í þrjú tímabil.

Lawson var auðvitað á miklum hraða og hefði lítið getað gert ef þeir hefðu verið aðeins nær.

Hann var þarna að koma til baka inn á brautina eftir stopp í kjölfar áreksturs á fyrsta hring. Skipta þurfti um framvæng hjá honum.

„Ég hefði getað drepið þá,“ kallaði Liam Lawson, skiljanlega sleginn í kallkerfi liðsins.

Hann var líka mjög ósáttur eftir keppnina. „Ég trúði því varla sem ég var að sjá fyrir framan mig. Ég var nýkominn úr beygju eitt og það voru bara tvær gæjar að hlaupa yfir brautina. Ég var nálægt því að keyra á annan þeirra,“ sagði Lawson við RacingNews365.

„Þetta var svo hættulegt. Það var augljóslega einhver misskilningur í gangi en ég hef aldrei áður orðið vitni að slíku. Þetta er algjörlega óásættanlegt,“ sagði Lawson.

Liðið hans Racing Bulls hefur einnig kallað eftir útskýringu á því hvað gerðist. Þetta hefði auðveldlega getað endað með dauðaslysi.