Barna­barn Donalds Trump keppir á LPGA-mótaröðinni

Kai Trump fékk sérstaka undanþágu frá styrktaraðila mótsins til að spila í The Annika-mótinu á Pelican-golfvellinum, sem haldið verður 13. til 16. nóvember. Þetta næstsíðasta mót á LPGA-mótaröðinni hefur venjulega einn sterkasta keppendahópinn fyrir utan stórmótin.

„Draumur minn hefur verið að keppa við þá bestu í heiminum á LPGA-mótaröðinni,“ sagði Kai Trump í fréttatilkynningu.

„Þetta mót verður ótrúleg upplifun. Ég hlakka til að hitta og keppa við svo marga af hetjum mínum og leiðbeinendum í golfi þegar ég mæti á mitt fyrsta mót á LPGA mótaröðinni,“ sagði Trump.

Hin átján ára gamla Kai Madison Trump er elsta barn Donalds Trump yngri og er nemandi á lokaári í Benjamin-skólanum í Palm Beach-sýslu. Hún er því jafnframt barnabarn Donalds Trump Bandaríkjaforseta.

Hún keppir í áhugamannamótum á landsvísu með American Junior Golf Association sem og í Flórída-fylki.

Kai er nú í 461. sæti á styrkleikalista AJGA Girls, eftir að hafa spilað á þremur mótum á þessu ári.

Kai Trump hefur samtals meira en sex milljónir fylgjenda á fjórum samfélagsmiðlum og stofnaði nýlega fatnaðar- og lífsstílsmerki sem miðar að því að styrkja ungar konur í íþróttum.

„Boð til styrktaraðila eru mikilvæg leið til að varpa ljósi á nýtt hæfileikaríkt fólk og vekja nýja athygli á mótum okkar og LPGA,“ sagði Ricki Lasky, yfirmaður viðskipta og rekstrar LPGA.

„Víðtækur fylgjendahópur Kai og umfang hennar hjálpar til við að kynna golf fyrir nýjum áhorfendum, sérstaklega meðal yngri aðdáenda. Við erum spennt að sjá hana taka næsta skref í ferðalagi sínu,“ sagði Lasky.

Annika hefur þegar tilkynnt að WNBA-stjarnan Caitlin Clark muni snúa aftur til að spila í Pro-Am annað árið í röð en Pro-Am verður haldið 12. nóvember.