„Margar góðar hendur í Krikanum komið að verki“

FH-ingar unnu vægast sagt öruggan sigur er liðið tók á móti KA í 10. umferð Olís-deildarinnar, en lokatölur urðu 45-32, FH í vil.

„Þetta var kannski ekki okkar besti varnarleikur, en ég er ánægður með sóknarleikinn og kraftinn í honum. Góð tvö stig á móti KA-liði sem mér finnst búið að vera rábært í vetur.“

Þrátt fyrir að hans menn hafi skorað 45 mörk í leik kvöldsins vildi Sigursteinn ekki meina að FH-ingar hafi spilað fullkominn sóknarleik.

„Nei, kannski ekki tía, en það var margt mjög jákvætt sem við vorum búnir að leggja góða vinnu í fyrir þennan leik. Gaman að sjá hvernig okkur tókst að koma því í verk.“

Þá nýtti hann einnig tækifærið og hrósaði KA-mönnum fyrir sína frammistöðu í vetur, en fyrir leikinn gat KA jafnað Aftureldingu og Hauka á toppi deildarinnar.

„Mér finnst þeir búnir að vera frábærir. Ég er búinn að sjá fullt af leikjum hjá þeim og það er kominn flottur bragur á þetta hjá KA. Andri er bara að gera geggjaða hluti með þá,“ sagði Sigursteinn áður en hann nefndi það sem honum fannst vanta hjá sínum mönnum í kvöld.

„Við vorum í brasi varnarlega í seinni hálfleik. En það var kominn góð staða og við slökuðum kannski óþarflega mikið á. Svo náðum við að bæta aftur í þetta í lokin og það skilaði stórum og góðum sigri.“

Að lokum var Sigursteinn spurður út í frammistöðu Garðars Inga Sindrasonar, sem gerði sér lítið fyrir og skoraði 13 mörk úr 13 skotum fyrir FH.

„Mér fannst hann stórkostlegur, eins og öll útilínan okkar. Eins og ég sagði hérna áðan þá lögðum við mikla vinnu í sóknarleikinn eftir síðasta leik þar sem sóknarleikurinn var ekki góður. Það hafa margar góðar hendur í Krikanum komið að verki í þeim málum og ég er mjög ánægður með það. Bæði Garðar og Ómar (Darri Sigurgeirsson) og fleiri að gera þetta af miklum og góðum krafti. Við vorum að koma á réttum tíma og þar af leiðandi voru þeir í mesta brasi með okkur,“ sagði Sigursteinn að lokum.