Skýrsla Ágústs: Góðir mögu­leikar í milliriðlinum

Vitað var fyrirfram að Ísland myndi vinna Úrúgvæ og fjórtán stiga sigur skilaði sér að lokum eftir flotta byrjun í fyrri hálfleik og ágætis áframhald í seinni hálfleik.

Einu áhyggjurnar voru þær að tapið gegn Serbíu myndi sitja illa í liðinu og gera stelpurnar litlar í sér en okkur konur mættu með kassann út.

Allir leikmenn Íslands komu við sögu í leiknum og lögðu sitt af mörkum, álagið dreifðist vel og engin ætti að vakna úrvinda fyrir ferðalagið í fyrramálið.

Ánægulegt var að sjá þær sem hafa lítið spilað spretta úr spori og svo átti fyrirliðinn Sandra Erlingsdóttir sinn besta leik á mótinu, mikilvægt að hún mæti í milliriðilinn í jafn góðu stuði og Elín-urnar hafa verið í.

Thea Imani Sturludóttir komst líka í mjög góðan takt og þrusaði svoleiðis á úrúgvæska markmanninn. Skotin hennar eru óstöðvandi ef sóknin nær að stilla vel upp fyrir hana.

Andrea Jacobsen spilaði ekki í dag, eins og hún stefndi á að gera, en hefur verið skráð til leiks á HM og gæti komið inn í næsta leik.

Hún væri mjög öflugur liðsstyrkur, við lið sem hefur staðið sig stórvel á mótinu og sýnt mjög góðar frammistöður.

Yfirlýstu markmiði mótsins er náð, nú þarf að setja ný. Ísland mætir Svartfjallalandi, Spáni og Færeyjum í næstu leikjum og ofureinföld íþróttastærðfræði segir okkur að sigurlíkurnar eru heilmiklar.

Ísland vann Færeyjar í síðasta leik fyrir HM, Færeyjar unnu síðan Spán í riðlakeppninni og Spánn vann Svartfjallaland í dag. Það getur allt gerst.

Þar með er alls ekki sagt að Ísland eigi eftir að vinna alla leiki og komast áfram í átta liða úrslit. Það er mjög ólíklegt að þetta unga og reynslulitla lið gerist svo öflugt, en riðlakeppnin kennir okkur að það býr hellings góður handbolti og mikill karakter í stelpunum okkar.

Landsliðsþjálfarinn hefur margoft talað um langtímaverkefnið, vegferðina sem þetta lið er á og uppbygginguna sem á eftir að eiga sér stað næstu árin.

Nú verða vonir bundnar við að liðið stígi enn eitt framfaraskrefið og þó að markmiðinu sé náð, að þá verði fagnað oftar en einu sinni á þessu móti, það er allavega dauðafæri á því.