FH sótti sigur í greipar ÍBV og Valur vann spennutrylli

Eyjamenn byrjuðu leikinn betur, voru með yfirhöndina nær allan fyrri hálfleikinn og leiddu með tveimur mörkum í hálfleik, 15-13.

Því forskoti héldu þeir allt þar til að rétt innan við stundarfjórðungur var eftir af leiknum og Jakob Martin jafnaði leikinn fyrir FH, 20-20.

FH-ingar gengu á lagið, tóku forystuna í kjölfarið, létu hana aldrei af hendi og unnu að lokum sex marka sigur, 29-23.

Símon Michael Guðjónsson var markahæstur í liði FH í kvöld með sex mörk og þá reyndist Birgir Már Birgisson drjúgur með fimm mörk í fimm tilraunum. Þá átti Jón Þórarinn Þorsteinsson góða innkomu í marki gestanna og varði sex skot af þeim fimmtán sem hann fékk á sig, var með fjörutíu prósent markvörslu. 

Stórleikur Sigtryggs Daða Rúnarssonar dugði ekki til hjá ÍBV. Hann skoraði tíu mörk í leik kvöldsins og var lang markahæsti maður vallarins. 

Með sigrinum vippar FH sér upp í 4.sæti deildarinnar en þar er liðið með 17 stig. ÍBV er í 6.sæti með 15 stig.

Björgvin Páll tryggði Val sigur

Þá vann Valur eins marks sigur á Þór Akureyri í spennutrylli á Hlíðarenda þar sem leikar enduðu 31-30, Val í vil. 

Sá leikur var jafn allt til loka og voru Valsmenn einu marki yfir á lokasekúndunum þegar að Þórsarar fengu tækifæri til þess að jafna leikinn. Þeim gekk hins vegar erfiðlega að að sækja í átt að markinu og urðu að lokum að reyna skot frá miðju sem að Björgvin Páll varði í marki Vals og tryggði liðinu þar með eins marks sigur. 

Valur tyllir sér þar með á toppi Olís deildarinnar. Þar er liðið með 22 stig og tveggja stiga forskot á Hauka sem leika þessa stundina gegn ÍR og geta með sigri jafnað Val að stigum. Þórsarar eru í 11.sæti með sjö stig.