Fyrrum kappaksturshetja og fjöl­skylda hans létust í flug­slysi

Hinn 55 ára gamli Biffle, eiginkona hans Cristina, fjórtán ára dóttir hans Emma og fimm ára sonur hans Ryder létust í slysinu. Aðrir um borð í vélinni voru Dennis Dutton, sonur hans Jack og Craig Wadsworth.

Biffle var valinn af NASCAR sem einn af 75 bestu ökumönnum sögunnar, var tilnefndur í heiðurshöllina fyrir kappakstursíþróttina og keppti í átján ár á stærsta sviðinu.

Þrátt fyrir allar keppnirnar og nokkra eftirminnilega sigra er hans þó ef til vill best minnst fyrir óeigingjarnt og óþreytandi starf sitt við að hjálpa öðrum sem þyrluflugmaður, þegar hann veitti aðstoð fyrir ári síðan í eyðileggingunni sem fellibylurinn Helene skildi eftir sig.

Fluggögn sýna að flugvélin var skráð á fyrirtæki sem Biffle rak.

Mikill eldur kviknaði í Cessna C550-vélinni þegar hún skall til jarðar. Hún fór í loftið frá Statesville-svæðisflugvellinum, um 72 kílómetra norður af Charlotte, skömmu eftir klukkan tíu á fimmtudagsmorgun, en hrapaði skömmu síðar við tilraun til að snúa við og lenda, að sögn umferðareftirlits Norður-Karólínu.

Orsök slyssins var ekki ljós strax, né heldur ástæðan fyrir því að vélin sneri aftur til flugvallarins í súld og skýjuðu veðri.

Það var heldur ekki ljóst hvort Biffle hefði flogið vélinni þegar slysið varð. Skrár Flugmálastjórnar Bandaríkjanna sýna að hann hafði réttindi til að fljúga þyrlum og einshreyfils- og fjölhreyflavélum.

„Þessi harmleikur hefur skilið allar fjölskyldur okkar eftir með brostin hjörtu og orð fá því ekki lýst,“ segir í sameiginlegri yfirlýsingu sem gefin var út fyrir hönd fjölskyldnanna.

„Greg og Cristina voru ástríkir foreldrar og virkir mannvinir sem lifðu fyrir ungan son sinn Ryder og dóttur Gregs, Emmu. Emma var dásamleg manneskja með góða sál sem var elskuð af mörgum. Ryder var virkt, forvitið og óendanlega glaðvært barn.“

„Hvert og eitt þeirra þýddi allt fyrir okkur og fjarvera þeirra skilur eftir sig ómælanlegt tóm í lífi okkar,“ segir í yfirlýsingunni.