Heiðraði fórnar­lömb brunans í heima­bænum: „Við skíðuðum fyrir þau“

Líkt og annað svissneskt skíðafólk var Rast með sorgarband á handleggnum. Hún fór fyrstu ferð á heimsbikarmótinu sem fór fram í Kranjska Gora í Slóveníu, nýtti tækifærið vel og skíðaði til sigurs í stórsvigi í fyrsta sinn.

Hún er úr Valais kantónunni í Sviss, þar sem fjörutíu ungmenni létust í eldsvoða á gamlárskvöld og rúmlega hundrað slösuðust, margir alvarlega.

„Hræðilegt slys varð í heimabæ mínum um helgina. Hugur minn er hjá fjölskyldum fórnarlambanna. Við skíðuðum fyrir þau þessa helgi…

…Íþróttir eru tilfinningaríkar og ég vona að við höfum getað vakið einhverjar jákvæðar tilfinningar í dag. Fyrir mig er mjög erfitt að vera ekki heima, því ég veit að fólk á um sárt að binda, en vonandi munu einhverjir brosa eftir daginn“ sagði Rast, sem hefur nú orðið heimsbikarmeistari í bæði svigi og stórsvigi.

Sakamálarannsókn er hafin á hendur rekstrarstjórum skemmtistaðar Le Constellation í bænum Crans-Montana þar sem bruninn varð. Talið er að eldurinn hafi kviknað í lofti staðarins út frá gosblysi sem starfsmenn gengu með til þeirra sem höfðu keypt flöskur af áfengi.

Í tilkynningu frá saksóknarembættinu í Valais segir að rekstrarstjórarnir, sem eru franskir ríkisborgarar, séu grunaðir um manndráp af gáleysi, líkamsmeiðingar af gáleysi og íkveikju af gáleysi.

Skíðabærinn Crans-Montana á samkvæmt dagatali alþjóða skíðasambandsins að halda heimsbikarmót í bruni í lok janúar.

Stefnir á önnur gullverðlaun

Camille Rast var að hefja leik í svigi á heimsbikarmótinu í Slóveníu og sýndi frábæra frammistöðu í fyrstu ferð dagsins, eftir sigurinn í stórsviginu í gær.