Guð­laugur fer ekki fram í Reykja­vík

Guðlaugur Þór segir það verkefni blasa við í færslu sem hann birti rétt í þessu að reisa þurfi Reykjavík úr „þeim rústum sem óstjórn vinstrimeirihluta síðustu ára skilur eftir sig.“

Hann segir enga framtíðarsýn í stjórn borgarinnar, fjármálin séu í rúst og að í samgöngumálum sé mest kapp lagt á að koma í veg fyrir að fólk komist leiðar sinnar.

„Þessu þarf að breyta og um það snúast kosningarnar í vor. Mestu máli skiptir að tryggja að nauðsynlegar breytingar verði á stjórn borgarinnar og þær breytingar verða ekki án þess að Sjálfstæðisflokkurinn hafi sterkt umboð frá Reykvíkingum til að stýra málum til betri vegar,“ segir Guðlaugur Þór í færslunni. 

Hann segist hafa mikinn metnað fyrir hönd Reykvíkinga og vilji leggja sitt af mörkum. Hann hafi velt því alvarlega fyrir sér að bjóða sig fram til að leiða lista Sjálfstæðisflokksins en að vandlega íhuguðu máli hafi hann komist að þeirri niðurstöðu að þátttaka hans myndi kalla fram flokkadrætti sem hafi verið flokknum erfiðir á síðustu árum.

„Þrátt fyrir þær áskoranir sem ég hef fengið á síðustu vikum og þrátt fyrir þann mikla stuðning sem ég hef fundið, þá hefur sú skoðun mín ekki breyst – skoðun sem ég lýsti í aðdraganda landsfundar Sjálfstæðisflokksins í mars síðastliðnum þegar mögulegt framboð mitt til formanns bar á góma – að ég þyrfti að leggja mitt af mörkum til að draga úr þessum flokkadráttum.

Erfiðir flokkadrættir

Slíkir flokkadrættir nú, þegar á brattan er að sækja í landsmálum en sóknarfæri eru á því að fella vinstrimeirihlutann í Reykjavík, eru ekki það sem Sjálfstæðisflokkurinn þarf á að halda. Ég trúi því og treysti að um þetta getum við sjálfstæðismenn í Reykjavík staðið saman, hvar í fylkingu sem menn telja sig standa,“ segir Guðlaugur í færslu sinni.

Hann segir margt benda til þess að Reykvíkingar séu búnir að fá sig fullsadda af óstjórn vinstrimeirihlutans í Reykjavík og að sóknarfæri séu til staðar fyrir Sjálfstæðisflokkinn að taka á ný við forystu í borginni.

„Til þess þurfum við sjálfstæðismenn að ganga samhentir til verka og fylkja liði að baki forystu flokksins í höfuðborginni,“ segir hann að lokum.

Mikið hefur verið fjallað um það síðustu daga að Guðlaugur ætli fram gegn sitjandi oddvita, Hildi Björnsdóttur. Í byrjun desember mældist Sjálfstæðisflokkurinn með 31 prósent fylgi í Reykjavík og var þannig sá stærsti. Í annarri könnun, nokkrum dögum seinna, kom fram að um níu prósent vilji Hildi sem borgarstjóra. Í byrjun janúar mældist flokkurinn svo með 35 prósenta fylgi. 

Guðlaugur Þór birti færslu á Facebook-síðu sinni fyrir stuttu. Fréttin hefur verið uppfærð.