„Gerði mér ekki einu sinni grein fyrir því hversu sér­stakir þeir voru“

Joshua hlaut minni háttar meiðsl í slysinu þann 29. desember og eftir að hafa verið útskrifaður af sjúkrahúsi sneri hann aftur til Englands áður en hann var viðstaddur útfarir Latif Ayodele og Sina Ghami síðastliðinn sunnudag.

„Takk fyrir alla ástina og umhyggjuna sem þið hafið sýnt bræðrum mínum. Ég gerði mér ekki einu sinni grein fyrir því hversu sérstakir þeir voru. Ég var bara vanur að eyða tíma með þeim og segja brandara, án þess að vita að Guð héldi mér í návist stórmenna. Þetta er hundrað prósent erfitt fyrir mig, en ég veit að það er enn erfiðara fyrir foreldra þeirra. Ég er með sterkan haus og ég trúi því að Guð þekki hjörtu þeirra. Megi Guð miskunna bræðrum mínum,“ skrifaði Joshua.

Ayodele, einkaþjálfari fyrrverandi tvöfalda heimsmeistarans í þungavigt, og Ghami, styrktar- og þrekþjálfari Joshua til langs tíma, létust báðir á slysstað.

Nígeríska lögreglan ákærði ökumann bifreiðarinnar, Adeniyi Mobolaji Kayode, 46 ára, fyrir hættulegan akstur sem olli dauða. Slysið varð á fjölförnum þjóðvegi sem tengir Lagos og Ibadan í suðvesturhluta Nígeríu þegar Lexus-jeppinn sem þeir ferðuðust í ók aftan á kyrrstæðan vörubíl.

Joshua, 36 ára, sem á ættir að rekja til Nígeríu, var í fríi í landinu eftir sigur sinn á YouTuber-sem-varð-boxaranum Jake Paul í Miami þann 19. desember.