Hákon lagði upp en Endrick sá til þess að Lille félli úr bikarnum

Lille mátti þola algjöra martraðarbyrjun því strax á fyrstu mínútunni gerði markvörðurinn Arnaud Bodart skelfileg mistök og færði Afonso Moreira mark á silfurfati.

Hákon nýtti sér að sama skapi mistök markvarðar Lyon þegar hann lagði upp jöfnunarmark fyrir Nathan Ngoy á 28. mínútu.

Lyon náði hins vegar að komast yfir að nýju rétt fyrir hálfleik og þar var á ferðinni brasilíska ungstirnið Endrick, kominn að láni til félagsins frá Real Madrid.

Ekkert var skorað í seinni hálfleiknum og Lille byrjar því nýja árið frekar illa, því áður hafði liðið tapað 2-0 á heimavelli gegn Rennes í frönsku deildinni fyrir viku.