Danir í sjokki eftir fyrsta tapið á heima­velli í tólf ár

„Þetta var gjörólíkt okkur. Við gerðum fullt af mistökum og við vorum kærulausir með boltann, sendingarnar sem við sendum þegar við vorum undir pressu voru skelfilegar“ sagði landsliðsþjálfarinn Nikolaj Jakobsen eftir 29-31 tapið gegn Portúgal í gær.

Stjörnuleikmaður liðsins, hornamaðurinn Mathias Gidsel, tók undir með þjálfaranum.

„Þetta eru gríðarleg vonbrigði. Við getum ekki sætt okkur við þetta. Það er eitt að tapa en að tapa svona er sérstaklega sárt.“

Danmörk er núna í þeirri stöðu að þurfa að vinna alla fjóra leikina í milliriðlinum, gegn Frakklandi, Spáni, Þýskalandi og Noregi, til að tryggja sig áfram í undanúrslit.

„Við erum búnir að setja hámarkspressu á okkur sjálfa og vitum hvað við þurfum að gera í næstu leikjum. Nú þurfum við bara að sjá til hvort það takist“ sagði landsliðsþjálfarinn.

Danir hafa fagnað ótrúlegri velgengni á undanförnum árum í handboltanum en Evrópugullið hefur runnið þeim margsinnis úr greipum. Danmörk er fjórfaldur ríkjandi heimsmeistari og Ólympíumeistari 2016 og 2024, en biðin eftir EM-gulli hefur staðið síðan árið 2012. Silfur- og bronsverðlaun urðu niðurstaðan á síðustu tveimur Evrópumótum.