Sigurður Bjartur á leið til Spánar?

Það er félagið AD Mérida sem falast eftir kröftum Sigurðar. Miðillinn 433.is greindi fyrst frá þessu og sagði það nú undir leikmanninum komið hvort að hann myndi samþykkja að ganga í raðir spænska félagsins.

Mérida er í 11. sæti af 20 liðum í spænsku C-deildinni eftir 20 umferðir af 38 en á fína möguleika á að komast í umspil um sæti í B-deild.

Ljóst er að Sigurður Bjartur kæmi til með að skilja eftir stórt skarð fyrir skildi í Krikanum en hann skoraði sextán mörk í Bestu deildinni á síðustu leiktíð, í 26 leikjum, og þar af sex mörk í fimm leikjum eftir skiptingu deildarinnar.

Hann er uppalinn hjá Grindavík en gekk svo í raðir KR fyrir tímabilið 2022, eftir 17 mörk í Lengjudeildinni sumarið áður, og hefur svo spilað með FH síðustu tvö tímabil.