Hakkar í sig þá sem vildu reka Al­freð Gísla­son

Alfreð Gíslason þjálfari þýska landsliðsins gerði stór mistök í Serbaleiknum og tók þau líka á sig. Það þýddi að þýska liðið lenti í leik upp á líf eða dauða á móti sterku spænska liðinu sem Alfreð og strákarnir hans kláruðu með glæsibrag.

Þeir byrjuðu svo frábærlega í milliriðlinum með sigri á Portúgal í dag. Fyrir leikinn við Portúgala skrifaði Christian Zeitz stuttan pistil á samfélagsmiðilinn Linkedin þar sem hann hneykslaðist á viðbrögðum hinna svokölluðu sérfræðinga eftir þennan Serbaleik.

Háværar kröfur um að landsliðsþjálfarinn verði rekinn

„Tapið gegn Serbíu kveikti kunnugleg viðbrögð: Um leið og lokaflautið gall, tóku „meðvindasiglararnir“ til máls. Strax heyrast háværar kröfur um að „landsliðsþjálfarinn verði rekinn!“ og allt starf Alfreðs Gíslasonar ásamt árangri síðustu ára er dregið í efa,“ skrifaði Christian Zeitz en hann lék undir stjórn Alfreðs hjá Kiel.

„Það er hins vegar faglega hæpið að dæma frammistöðu heils tímabils út frá einum leik í riðlakeppni. Þeir sem skilja íþróttina vita að maður ætti að klára mótið áður en endanlegur dómur er felldur,“ skrifaði Zeitz.

Gjá á milli skoðunar og þekkingar

„Tjáningarfrelsi er mikils virði, en í atvinnuíþróttum er oft gjá á milli skoðunar og þekkingar. Þeir sem aldrei hafa sjálfir staðið á vellinum á EM eða HM vanmeta sálfræðilega gangverkið. Að leikur geti haft tvo gjörólíka hálfleiki er ekki merki um vanhæfni, heldur veruleiki sem sérhver íþróttamaður – frá áhugamanni til atvinnumanns – hefur upplifað á eigin skinni,“ skrifaði Zeitz.

„Hlutverk samfélagsmiðla og áhrifavalda þar er sérstaklega gagnrýnivert. Margir stökkva á tískuvagninn án dýpri tengsla við handboltann, eingöngu til að fylla rásina sína,“ skrifaði Zeitz.

Sviðsetja tengsl sem eru ekki til staðar

„Skyndilega er tíu ára gömul mynd með landsliðsmanni dregin fram til að sviðsetja tengsl sem eru ekki til staðar í daglegu lífi. Í dag er það handbolti, á morgun önnur íþrótt – aðalatriðið er að fylgjendatölur og „like“ séu í lagi. Þessi tegund yfirborðsmennsku gerir hörðum kjarna handboltaíþróttarinnar ekki rétt,“ skrifaði Zeitz.

Markus Baur, þjálfari Frisch Auf Göppingen í þýsku deildinni, tekur líka undir þetta í athugasemdum við færsluna.

Draga í efa hæfni og frammistöðu þjálfara og leikmanna

„Ég er alveg sammála þér. Sérstaklega á Evrópumótinu í handbolta (en líka almennt í íþróttaheiminum) sjáum við oft hvernig meintir „sérfræðingar“ einbeita sér að einstökum neikvæðum atriðum til að draga í efa hæfni og frammistöðu þjálfara og leikmanna. Þetta kann að vekja athygli og afla smella til skamms tíma, en fyrir þá sem raunverulega þekkja til er þetta oft pirrandi,“ skrifaði Markus Baur.

„Sérstaklega í handbolta, sem er þekktur fyrir að vera kaflaskiptur leikur, munum við aldrei sjá leik án mistaka. Það sem skiptir máli er hvernig liðið tekst á við veikleika á uppbyggilegan hátt til að geta bætt sig markvisst í næsta leik. Að mínu mati sýndi þýska liðið þetta á áhrifamikinn hátt í leiknum gegn Spáni,“ skrifaði Baur.