Íranar reyndu að stöðva danskt olíu­flutninga­skip

Skipinu er siglt undir bandarískum fána en er, samkvæmt frétt Wall Street Journal, í eigu danska fyrirtækisins Stena Bulk. Verið var að sigla skipinu frá Sameinuðu arabísku furstadæmunum til Barain, þar sem Bandaríkjamenn reka stóra flotastöð.

Íranar hafa áður stöðvað skip eða reynt að stöðva þau á Hormuz-sundi en gífurleg spenna er á svæðinu.

Bandaríkjamenn hafa sent umtalsverðan herafla og herskip til Mið-Austurlanda og hefur Donald Trump, forseti, gefið til kynna að árásir gegn klerkastjórninni í Íran komi til greina. Er það í kjölfar umfangsmikilla mótmæla í Íran þar sem öryggissveitir klerkastjórnarinnar eru sakaðar um að hafa banað þúsundum mótmælenda.

Viðræður milli erindreka frá Íran og Bandaríkjunum eiga að fara fram í Tyrklandi á föstudaginn. WSJ segir klerkastjórnina hafa hótað því í dag að hætta við viðræðurnar, en þær eru meðal annars sagðar snúast um kjarnorkuvopnaáætlun Íran en ráðamenn annarra ríkja í Mið-Austurlöndum komu að því að skipuleggja þær, með því markmiði að koma í veg fyrir stríð.

Hafa stöðvað skip úr skuggaflota sem Íranar nota

Bandaríkjamenn hafa á undanförnum vikum stöðvað og lagt hald á þó nokkur olíuflutningaskip sem tilheyrðu svokölluðum „skuggaflota“ Rússa. Þann flota notuðu ríki eins og Rússland, Íran og Venesúela til að komast hjá viðskiptaþvingunum og refsiaðgerðum.

Frakkar stöðvuðu einnig skip úr flotanum á dögunum og hafa fregnir borist af því að sambærilegar aðgerðir séu til skoðunar víðar.

Hundruð skipa tilheyra skuggaflotanum en þeim hefur fjölgað mjög á undanförnum árum. Flotinn er talinn hafa flutt um 3,7 milljarða tunna af olíu í fyrra eða um sex til sjö prósent af heildarmarkaði síðasta árs.

Mörg skipanna eru orðin gömul og eru slys nokkuð tíð. Þá eru mörg skipanna einnig ótryggð.

Sjá einnig: Svona virkar „skuggaflotinn“

Samkvæmt alþjóðasamþykktum um skipaflutninga eiga skip að vera skráð í tilteknum ríkjum og bera fána þeirra. Skip eru þá bundin reglum og lögum þeirra ríkja þar sem þau eru skráð. Kerfið var þróað til að tryggja að flutningaskip séu tryggð og að komið sé vel fram við áhafnarmeðlimi.

Svokölluð skuggaskip notast oft við fána fátækra smáríkja og í mörgum tilfellum í skiptum fyrir greiðslur til þessara ríkja.