Hefur verið 73 kíló í 55 ár en bætti að­eins á sig þegar bjórinn var leyfður

Hilmar Þór Björnsson arkitekt fagnaði áttræðisafmælinu í fjörutíu ára gömlum jakkafötum sem smellpössuðu á hann enn þá. Vala Matt fór og heimsótti Hilmar Þór og eiginkonu hans Svanhildi og dóttur þeirra Maríu Sigrúnu sjónvarpskonu og fékk að heyra leyndarmálin á bak við unglegt útlit Hilmars.

Hilmar er nú hættur að teikna hús og hefur snúið sér að ýmsum áhugamálum, til dæmis skrifum og vangaveltum um borgarskipulagsmál í Reykjavík sem hafa vakið mikla athygli. En þar hefur hann meðal annars bent á hvernig glænýju hverfin í borginni eru byggð það þétt að aðeins örfá bílastæði eru á lóðunum og víða eru hreinlega engin bílastæði fyrir gesti íbúanna.

Og er Hilmar einn af örfáum sem tjá sig um þessi mál. Hilmar er mjög hlynntur Borgarlínunni en telur að best væri að hún væri komin áður en farið er í að fækka einkabílunum.

En eins og áður segir fagnaði hann áttræðisafmæli sínum í fjörutíu ára jakkafötum sem hann keypti í París á sínum tíma.

„Ég keypti þau um sumar og ég hef nú ekki notað þau mikið síðan, en þetta passaði,“ segir Hilmar og heldur áfram.

Bjórinn kostaði sitt

„Ég held ég hafi verið 73 kíló frá því ég var svona 25 ára og er það enn þá. Svo kom bjórinn þarna 1989, þá fitnaði ég um þrjú kíló. Ég byrjaði ekkert að vinna í þeim. Líkaminn tók við þessu og lagaði sig sjálfur,“ segir Hilmar léttur.

„Ég hef ekki passað mig mjög mikið í gegnum árin en konan mín, hún náttúrulega sér um að ég sé á sæmilegu mataræði og passar upp á að ég borði hollt. En ég held að aðalatriðið sé sem sagt að hætta að borða þegar maður er saddur. Og svo þarf maður náttúrulega að hreyfa sig. Ég held að það sé fyrst og fremst málið. Ég spila badminton tvisvar í viku og karlaleikfimi hjá Gauta Grétarssyni tvisvar í viku. Hann veitir manni mikið aðhald. Ég er búinn að vera í þessu í 30-40 ár.“

Hér að neðan má sjá innslagið í heild sinni þar sem rætt er við eiginkonu hans Svanhildi og dóttur, Maríu Sigrúnu fréttakonu á RÚV.