„Há­punktur ferilsins“ á opnunar­há­tíð Ólympíu­leikanna

Setningarhátíðin var með breyttu sniði að þessu sinni, enda er þetta í fyrsta sinn sem opinber staðsetning leikanna er í tveimur borgum frekar en einni.

Borgirnar Mílanó og Cortina héldu sitt hvora opnunarhátíðina í gærkvöld og tendruðu sitt hvoran Ólympíueldinn. Minni hátíðir voru svo haldnar víðsvegar um ítölsku Alpanna.

Mikill viðbúnaður var í Mílanó í kringum opnunarhátíðina. Stuðningshópar Ísrael og Palestínu hafa til dæmis tekist á á götum úti en umfangsmesta lögregluaðgerðin í Mílanó tengdist komu JD Vance, varaforseta Bandaríkjanna, sem mætti á svæðið með hvorki meira né minna en þrjú hundruð öryggisverði í fjórtán mismunandi flugvélum.

Ísland átti ekki fulltrúa á San Siro leikvanginum í Mílanó en Elín Elmarsdóttir van Pelt, sem keppir fyrir Íslands hönd í alpagreinum, var fánaberi á setningarhátíðinni í Cortina.

„Ég er gríðarlega stolt að fá að bera þennan íslenska fána inn á völlinn, það er alveg hápunktur ferilsins, svo sannarlega. Þetta hefur verið draumur alveg síðan ég man eftir mér, að fara á Ólympíuleikana“ sagði Elín.

Hinir þrír íslensku keppendurnir voru svo staddir allt annars staðar, í fjallaþorpinu Livigno. Það eru Dagur Benediktsson og Kristrún Guðnadóttir, sem keppa fyrir Íslands hönd í skíðagöngu, og fánaberinn, alpagreinakappinn Jón Erik Sigurðsson.

Fjallað var um opnunarhátíð Vetrarólympíuleikanna í Sportpakka Sýnar í gærkvöldi. Innslagið má sjá í spilaranum að ofan.

Dagur hefur keppni fyrstur Íslendinga á morgun, í 20 kílómetra skiptigöngu sem hefst klukkan hálf tólf. Kristrún stígur svo á stokk á þriðjudag en Jón og Elín hefja keppni næsta fimmtudag og föstudag.

Keppnisdagskrá Íslendinga

Dagur Benediktsson

8. febrúar – 20 km skiptiganga (10 km klassískt / 10 km frjálst)

10. febrúar – Sprettganga, klassískt

13. febrúar – 10 km frjálst

21. febrúar – 50 km klassískt

Kristrún Guðnadóttir

10. febrúar – Sprettganga, klassískt

12. febrúar – 10 km frjálst

Jón Erik Sigurðsson

14. febrúar – Stórsvig

16. febrúar – Svig

Elín Elmarsdóttir Van Pelt

15. febrúar – Stórsvig

18. febrúar – Svig