Ari Edwald leiðir Mið­flokkinn í borginni

Miðflokkurinn á engan borgarfulltrúa eins og stendur en hefur mælst sögulega hár í skoðanakönnunum á landsvísu á undanförnum vikum og mánuðum. Helgi Áss Grétarsson, fyrsti varaborgarfulltrúi Sjálfstæðisflokksins, gekk til liðs við flokkinn í síðasta mánuði.

Fréttastofa reyndi að hafa samband við Ara í gær eftir að Miðflokkurinn birti stutt myndband um yfirvofandi tilkynningu um oddvita sinn í borginni en hann svaraði ekki.

Ari, sem er á 62. aldursári, var meðal annars forstjóri fjölmiðlaveldisins 365 á sínum tíma, framkvæmdastjóri Samtaka atvinnulífsins og aðstoðarmaður ráðherra. 

Hann fór í leyfi frá starfi forstjóra Íseyjar, systurfélags Mjólkursamsölunnar, eftir að Vítalía Lazareva kærði hann og tvo aðra fyrir kynferðisbrot árið 2022. Kæran var síðar felld niður.

Samkvæmt símaskrám á netinu er Ari skráður til heimilis í Garðabæ og Portúgal.

Sonur Ara, Páll Edwald, sækist einnig eftir sæti á lista Miðflokksins í borginni. Hann tilkynnti um framboð sitt í síðustu viku.

Fréttin verður uppfærð.