Mikil­vægur sigur Tinda­stóls sem fær heima­vallarrétt í Evrópu

Fyrir leik kvöldsins var Tindastóll nú þegar búið að tryggja sig inn í útsláttarkeppni deildarinnar en var enn á höttunum eftir heimavallarrétt í þeim hluta keppninnar sem efstu átta sæti deildarkeppninnar veita og vissu að sigur í kvöld myndi tryggja heimavallarréttinn

Það var á brattann að sækja fyrir Sauðkrækinga snemma leiks í kvöld því Belgarnir mættu tilbúnir í verkefnið og leiddu lengi vel í fyrri hálfleik. Mest leiddi lið Brussels með tuttugu stigum um miðbik annars leikhluta en Stólarnir náðu að saxa hægt og bítandi á það forskot sem stóð að lokum í fjórum stigum 47-51, þegar liðin gengu inn til búningsherbergja í hálfleik.

Seinni hálfleikurinn bauð upp á mikla spennu þar sem að liðin skiptust á því að hafa forystuna. Gestirnir frá Belgíu leiddu með einu stigi, 88-89 þegar að rétt rúmar fjórar mínútur eftir lifðu leiks. 

Stólarnir eru ólseigir í Síkinu, gefast aldrei upp, þeir sneru leiknum sér í hag og unnu að lokum sex stiga sigur 98-92.

Sigurinn gerir það að verkum að Tindastóll er nú í fjórða sæti ENBL deildarinnar með fjórtán stig eftir alla sína leiki í deildarkeppninni. Stólarnir eru öruggir með að enda í einu af efstu átta sætum deildarkeppninnar og fá þar með heimavallarrétt í útsláttarkeppninni.

Dedrick Basile var stigahæstur í liði Tindastóls í kvöld með 23 stig.