Elías hélt hreinu í undan­úr­slitum

Fyrri hálfleikurinn fór rólega fram og sá fá færi. Rétt fyrir hálfleik kom Midtjylland boltanum í netið, en markið fékk ekki að standa.

AGF beitti hápressu í upphafi seinni hálfleiks en það skilaði ekki góðum árangri og Midtjylland tók forystuna á 62. mínútu með marki upp úr hornspyrnu.

Lee Han-Beom skallaði boltann í netið eftir sendingu Aral Simsir.

AGF ógnaði markinu tvívegis áður en leiknum lauk en tókst ekki að sigra Elías.

Tómas Óli Kristjánsson kom inn af varamannabekk AGF á 77. mínútu en náði ekki að setja mark sitt á leikinn.

Midtjylland verður með 1-0 forystu þegar seinni leikur liðanna fer fram þann 8. mars. Hinumegin í undanúrslitum er FCK með 2-1 forystu gegn Viborg.