Hjörtu Svía brotin: „NEI, NEI, NEI“

Allir bjuggust við sigri sænska liðsins í dag sem hefur innanborðs margar af allra bestu skíðagöngukonum heims. Líkurnar voru taldar um 90 prósent á sænsku gulli fyrir keppnina og sænskir miðlar töluðu um gullna daginn sem væri fram undan.

Það kveður við annan tón að keppninni lokinni. „NEI, NEI, NEI,“ segir í fyrirsögn Aftonbladet.

Ebba Anderson lenti í miklum vandræðum í brautinni í dag. Hún féll tvisvar við og í síðara skiptið braut hún annað skíði sitt sem hægði verulega á henni. Liðið var komið mínútu og 18 sekúndum á eftir Noregi í kjölfar þess.

„Þetta er martröð. Ég missti fæturna á niðurleiðinni og stuttu seinna tek ég heljarstökk og skíðin héldu ekki. Þá kemur stress og kvíði. Auðvitað er gríðarlega sorglegt að draga liðsfélagana niður með þessum hætti,“ hefur Aftonbladet eftir Andersson.

„Þetta særir hjarta mitt,“ bætir hún við.

Frida Karlsson og Jonna Sundling tóku við keflinu af Andersson og skiluðu sænska liðinu silfri. Ekki tókst að vinna upp forskot Norðmanna sem fögnuðu gulli.