KA vann meistarana og Stígur Diljan sá rautt

Hallgrímur Mar Steingrímsson átti stóran þátt í sigrinum en hann kom KA yfir eftir um hálftíma leik með frábæru skoti beint úr aukaspyrnu.

Hallgrímur átti svo einnig hornspyrnuna sem seinna mark KA kom úr, um það bil 25 mínútum fyrir leikslok, en þá skoraði Birgir Baldvinsson sem var fyrirliði KA í leiknum, eftir að markvörðurinn Aron Snær Friðriksson missti boltann til hans.

Þarna voru Víkingar orðnir manni færri því Stígur Diljan Þórðarson hafði fengið rautt spjald fyrir að sparka í leikmann KA þegar Víkingar voru að undirbúa hornspyrnu.

KA náði sér þarna í sín fyrstu þrjú stig í keppninni, eftir tvö töp, en Víkingar eru með fjögur stig. KR er efst í 3. riðli með sjö stig.