Júnía Lín frum­sýndi kærastann

Júnía hefur slegið í gegn vestanhafs í samstarfsverkefnum hennar með tvíburasystur sinni, Laufeyju Lín, en Júnía hefur meðal annars leikstýrt tónlistarmyndböndum fyrir systur sína.

Að tilefni valentínusardagsins í gær birti hún myndir af ástinni sinni, Alex Ashton. 

Ashton, sem er með stærðfræði- og tölvunarfræðigráðu frá Kólumbíuháskóla, er einn af eigendum markaðsstofunnar Agency Eight sem hann stofnaði ásamt Aurielle Kaminski í New York árið 2023. Stofan sérhæfir sig í markaðssetningu meðal áhrifavalda. 

Hann er titlaður sem rekstrarstjóri Agencey Eight á síðu markaðsstofunnar, en þar segir að hann hafi einnig unnið í tvö ár við forritun og gagnaúrvinnslu hjá Amazon og síðan stýrt markaðssetningu hjá Basic.Space.

Í lok síðasta árs komust Ashton og Kaminski, hinn meðstofnandi markaðsstofunnar, á lista Forbes yfir 30 manns undir þrítugu sem hafa náð hvað mestri velgengni á sviði markaðssetningar. 

Í umfjöllun Forbes frá því í lok síðasta árs kom fram að til stæði að þessi fjórtán manna vinnustaður myndi skila hagnaði upp á 2,3 milljónir dollara (280 m. kr.) árið 2025.

Afrakstur Júníu hefur vakið mikla athygli og á hún sjálf stóran aðdáendahóp. 

Nýlega fagnaði systir Júníu, Laufey, tveggja ára sambandsafmæli með sínum heittelskaða Charlie Christie.