Talinn hafa selt eigin­konuna til yfir 120 kaup­enda í Pelicot-máli Sví­þjóðar

Um þrjátíu menn eru sagðir eiga á hættu að verða dregnir fyrir dóm grunaðir um kynlífskaup en málið hefur verið í rannsókn um nokkurt skeið. Jafnréttismálaráðherra Svíþjóðar líkir því við mál hinnar frönsku Gisèle Pelicot.

Talið er að brotin hafi átt sér stað í yfir þrjú og hálft ár í Angurmannalandi, héraði í norðurhluta Svíþjóðar. Sænski ríkismiðillinn SVT greinir frá en til viðbótar við þá 120 sem sagðir eru að hafa brotið á konunni í eigin persónu bætast við stafræn kynferðisbrot. Eiginmaðurinn neitar sök og ganga hjónin nú í gegnum skilnað.

Ekki allir ákærðir

Saksóknari segir að ekki verði allir grunaðir kynlífskaupendur ákærðir. Ástæðan sé skortur á tíma og fjármagni þar sem um tvö ár í viðbót taki að rannsaka önnur brot í málinu.

Til stendur að gefa út ákæru á hendur eiginmanninum 13. mars, að sögn saksóknara. Eiga réttarhöld að hefjast skömmu síðar.

Að sögn SVT var kynlífsþjónusta konunnar auglýst á nokkrum vefsíðum. Fyrir tæpum tveimur árum sætti maðurinn rannsókn vegna gruns um líkamsárás gegn sömu konu. Rannsóknin var þá látin niður falla en hefur nú verið tekin upp aftur, samkvæmt saksóknara. 

Nina Larsson, jafnréttismálaráðherra Svíþjóðar, líkir málinu við Pelicot-málið í Frakklandi þar sem þáverandi eiginmaður Gisele Pelicot bauð miklum fjölda manna að brjóta á henni í um áratug.

Hefur áður hlotið dóm

Sænski ríkismiðilinn greinir frá því að eiginmaðurinn hafi áður verið dæmdur fyrir líkamsárás, ólögmæta nauðung og brot á vopnalögum, og afplánað fimm mánaða fangelsisdóm. Þar að auki hafi hann verið ákærður fyrir gróf bókhaldsbrot, með því að hafa látið hjá líða að færa til bókar tekjur í fyrirtæki sínu upp á um þrjár milljónir sænskra króna.

Fréttin er í vinnslu.