Skíðasambandinu fannst Hall­dór of slæm fyrir­mynd

Þetta segir Halldór í viðtali sem RÚV birti í morgun. Þar er vöngum velt yfir því hvers vegna besti snjóbrettamaður í sögu Íslands hefur aldrei tekið þátt á Vetrarólympíuleikunum.

Halldór segist sjálfur aldrei hafa haft áhuga á því að keppa á Ólympíuleikunum, sem hann kallar „Old Limp Dicks“ því þar eru „gamlir kallar í jakkafötum að græða fullt af peningum á íþróttafólki.“

Skylda hjá Nike að reyna við Vetrarólympíuleikana

Halldór hefur frekar einbeitt sér að öðrum keppnum og verkefnum, en þurfti árið 2013 að gera tilraun til að komast inn á Vetrarólympíuleikana. Það var skilyrði í samningi hans við íþróttavörurisann Nike og Halldór skráði sig til leiks í undankeppnum ÓL.

Halldór keppti hins vegar ekki fyrir hönd Íslands í þeim undankeppnum, heldur fyrir Mónakó.

„Ég hef haldið mig frá Skíðasambandinu eins og mikið og ég get. Þegar ég var að fara á ÓL þurfti ég að skrá mig í skíðasamband samt. Þá vildu þeir ekki hafa mig því ég var of slæm fyrirmynd. Það er eitt stærsta hrós sem ég hef fengið, sko“ sagði Halldór í viðtalinu og hann leitaði til Skíðasambands Mónakó.

Föttuðu að þeir gætu kannski grætt á þessu

„Mónakóbúar voru mjög pumpaðir. En þá kom Skíðasambandið til baka. Þeir föttuðu líka, held ég, að ég var styrktur af Nike, og ég var einn af aðalsnjóbrettagaurunum hjá Nike á þessum tíma. Ég held að þeir hafi líka séð að þeir gætu mögulega fengið einhvern pening frá Nike. Þannig að allt í einu breyttist þetta og þeir vildu endilega fá mig“ bætti Halldór við en hann komst á endanum ekki inn á leikana í Sochi árið 2014.

„Maður var að mynda snjóbrettamyndir fyrir Nike, að keppa í öðrum keppnum og gera Helgasons.com. Maður var með fókusinn á því. Það var mjög mikið í gangi á þessum tíma. Ég sá það þá líka, þegar ég fór á þessar FIS-keppnir, að ég fýlaði þetta ekki neitt. Vibe-ið var ekki fyrir mig og þetta var bara ekki næs“ sagði Halldór við RÚV.

Halldór er hins vegar mættur út til Ítalíu þar sem Vetrarólympíuleikarnir fara fram en hann tekur þátt í sýningarkeppni á snjóbretti. 

Rifjaði upp risasamninginn

Í viðtali fyrir þættina Atvinnumennirnir Okkar á Stöð 2 árið 2019 rifjaði Halldór það upp þegar Nike bauð honum risasamninginn, sem var á sínum tíma sá langstærsti sinnar tegundar í snjóbrettaheiminum. 

Innslagið má sjá hér fyrir neðan en þáttinn í heild sinni má finna á Sýn+.