Höfnuðu boði Trumps eftir grín hans í karla­klefanum

Trump hringdi í karlaliðið þegar það var enn að fagna Ólympíumeistaratitlinum inni í búningsklefa á sunnudaginn, eftir sigur gegn Kanada í framlengdum leik.

Þar bauð hann liðinu að vera viðstatt þegar hann flytur árlegt ávarp sitt til þingsins í kvöld, um stöðu ríkjasambandsins (e. The State of the Union). Ljóst er að leikmönnum þótti þetta mikill heiður og þeir tóku vel í boðið í símtalinu.

En í símtalinu gaf Trump einnig í skyn að hann neyddist til þess að bjóða kvennalandsliðinu líka. Það varð einnig Ólympíumeistari, með nákvæmlega sama hætti og karlaliðið því það vann Kanada í framlengdum úrslitaleik.

„Ég verð að segja ykkur að við verðum að bjóða kvennaliðinu,“ sagði hinn 79 ára gamli Trump og hló. „Þið vitið það. Ég held að ég yrði líklega kærður til embættismissis [ef kvennaliðinu yrði ekki boðið],“ bætti Trump við og áfram var hlegið.

Í yfirlýsingu frá kvennalandsliðinu er hvergi vísað í þetta grín forsetans heldur er boðinu hafnað með afar kurteisum hætti.

„Við erum innilega þakklátar fyrir boðið sem gullverðlaunaliði Bandaríkjanna í íshokkí kvenna var sent og kunnum vel að meta viðurkenninguna á einstökum árangri liðsins,“ sagði í yfirlýsingu frá bandaríska kvennaliðinu sem gefin var út í gær. 

Samkvæmt AP fréttaveitunni fengu landsliðskonurnar, sem unnu sinn titil síðasta fimmtudag, ekki að vita af boðinu fyrr en í fyrrakvöld og áttu þá orðið erfitt með að breyta sínum plönum. Á meðan að karlaliðið ferðaðist í einkaflugi til Miami í gærmorgun fóru konurnar með áætlunarflugi til Atlanta.

„Vegna tímasetningar og áður ákveðinna náms- og starfsskuldbindinga í kjölfar leikanna geta íþróttakonurnar ekki tekið þátt. Þeim þótti heiður að vera boðið og eru þakklátar fyrir viðurkenninguna,“ sagði einnig í yfirlýsingu kvennaliðsins.