Kisurnar hermdu eftir kanínunni fyrir bikar­vikuna

Framkonur, eða Framkisur eins og þær kalla sig á Instagram, minntu fylgjendur sína á bikarinn og líktu honum við Ofurskálina, eða Super Bowl, enda um hápunkt að ræða á handboltaleiktíðinni.

Alfa Brá Oddsdóttir Hagalín skellti sér í gervi Bad Bunny og liðsfélagar hennar hjálpuðu til við að endurskapa hálfleikssýningu söngvarans, og höfðu gaman af eins og sjá má.

Það verða einmitt Framkonur og Haukakonur sem stíga fyrstar á svið í undanúrslitunum, þegar liðin mætast á Ásvöllum á morgun klukkan 18. Þarna mætast liðin sem léku til úrslita í fyrra, þegar Haukar unnu langþráðan titil.

Síðar um kvöldið, eða klukkan 20:15, er svo leikur Vals og KA/Þórs.

Á fimmtudagskvöld er svo komið að körlunum en þá mætast FH og Haukar í Hafnarfjarðarslag klukkan 18, og ÍR og KA mætast svo klukkan 20:15.

Úrslitaleikur kvenna er á laugardaginn klukkan 15:30 og úrslitaleikur karla í kjölfarið, klukkan 18:30.