„Þetta verða mjög spennandi kosningar“

„Þetta verða mjög spennandi kosningar,“ segir Ólafur sem rýndi í niðurstöður nýrrar könnunar Maskínu í beinni útsendingu í kvöldfréttum Sýnar. Mesta spennan verði að sjá, þegar kosningaúrslitin liggja fyrir, hvaða flokkum tekst að mynda meirihluta.

Væri afrek að ná í 30% atkvæða

Könnunin var gerð í febrúar, eftir að fyrir lá að Pétur Marteinsson og Hildur Björnsdóttir muni leiða flokkana. Ólafur segist ekkert geta fullyrt um það hvort Pétur höfði jafnvel til meira til hægrisinnaðra jafnaðarmanna en til dæmis Heiða Björg Hilmisdóttir og Dagur B. Eggertsson, líkt og einhverjir hafa velt vöngum yfir.

„Ég hef ekki séð nein gögn sem benda til þess. Undanfarið hefur það verið þannig að það er mjög lítið fylgi sem að streymir á milli Samfylkingarinnar og Sjálfstæðisflokksins, þannig ef það gerðist núna þá væri það nýtt,“ segir Ólafur. Flokkarnir tveir séu turnar í þeim skilningi að þeir mælast langstærstir í könnunum, en aftur á móti mælist þeir báðir með innan við fjórðung af fylginu.

„Í Gallup-könnunum nýlega var Sjálfstæðisflokkurinn að mælast með yfir 30% og Samfylkingin líka stærri heldur en í þessari könnun. En þegar við lítum á þetta nýja flokkalandslag á Íslandi, núna sjáum við til dæmis að það eru átta flokkar sem kæmust inn í borgarstjórnina miðað við þessa könnun og sá níundi, hann vantar mjög lítið. Þannig það að komast yfir 30% í þessu nýja landslægi það væri mikið afrek, hvort heldur væri hjá Samfylkingunni eða Sjálfstæðisflokknum,“ segir Ólafur. „Það yrði gríðarlegur kosningasigur.“

Miðflokkurinn gæti átt inni en Framsókn „að hrynja“

En það er fleira forvitnilegt í könnuninni séu niðurstöðurnar bornar saman við úrslit síðustu borgarstjórnarkosninga. Nokkrar breytingar er til að mynda að sjá á fylgi Viðreisnar og Miðflokksins, en fylgi Miðflokksins hefur aukist talsvert á landsvísu.

Gæti það verið til marks um að hann bæti við sig í borginni?

„Hann var náttúrlega með nánast ekkert fylgi 2022, hann er ennþá ekki nema hálfdrættingur í borginni á við það sem hann er á landsvísu. Nú er það reyndar þannig að það er ekki alltaf fullt samræmi milli þess hvað gerist í borginni og hvað gerist í landinu, en miðað við þær tölur þá gæti hann átt eitthvað inni,“ segir Ólafur.

Á sama tíma sé Framsókn „að hrynja“ að sögn Ólafs, en flokkurinn hefur tapað um 75% fylgisins sem hann fékk í síðustu kosningum. „En það er ekkert nýtt og Viðreisn er í rauninni að koma mjög vel út. Miðað við síðustu kosningar þá er Viðreisn hátt í að þrefalda fylgið,“ segir Ólafur þegar hann rýnir í niðurstöður könnunarinnar og ber saman við útkomuna úr kosningunum 2022.

Góður árangur hjá Vinstrinu

Þá gæti verið tilefni fyrir Vinstrið, nýtt sameiginlegt framboð VG og Vors til vinstri, til að fagna.

„Miðað við þetta væru þau með tvo fulltrúa, það vantar ekkert mikið í þriðja fulltrúann þess vegna, það er frekar knappt. En ég held að þetta sé mjög góður árangur hjá Vinstrinu. Í síðustu kosningum var VG með 4% og Sósíalistaflokkurinn undir forystu Sönnu var með 7,7 eða 7,8%, samanlagt eru það tæp 12%. Núna eru þeir að mælast með um 9%, þeir virðast vera að fá meginpartinn af fylginu,“ segir Ólafur.

„Það verður mjög fróðlegt að sjá hvort að Vinstrinu takist að höggva eitthvað meira í fylgi Sósíalistanna eins og það mælist núna, og kannski líka Samfylkingarinnar.“