Boða til boxveislu þó það sé enn bannað

Frá þessu greindi atvinnuhnefaleikakappinn Kolbeinn Kristinsson sem Íslendingar fá þar með loksins að sjá í keppni á heimavelli. Mótherji hans verður enginn aukvisi en samkvæmt mmafrettir.is er það Austurríkismaðurinn Sasa Milenkovic sem unnið hefur 12 af 13 bardögum sínum, þar af 11 þeirra með rothöggi.

Valgerður Guðsteinsdóttir, Emin Kadri Eminsson, Norðmaðurinn Brage Lange, Hafþór Magnússon, Ísak Guðnason og Zalmai Jasur eru einnig á keppendalista kvöldsins, á síðu viðburðarins á tix.is, og ljóst að von er á erlendum keppinautum til  landsins en þau mál skýrast betur á næstunni.

Viðburðurinn sýnir að þolinmæði hnefaleikafólks virðist á þrotum gagnvart seinagangi á Alþingi við að breyta lögum um hnefaleika.

Áhugamannahnefaleikar voru leyfðir árið 2002 og því hefur verið hægt að halda mót í þeim en enn standa lögin sem banna atvinnuhnefaleika, þó að frumvörp hafi verið lögð fram um að breyta því. Heimilt er að sekta fólk fyrir brot á lögunum.

„Við erum sennilega eina þjóðin eftir í heiminum sem leyfir ekki að neinu leyti atvinnuhnefaleika. Í raun og veru er þetta bara út af gamalli mýtu og hræðsla við eitthvað sem fólk þekkir ekki,“ sagði Davíð Rúnar Bjarnason við Vísi árið 2024. Hann hefur haldið utan um Icebox-viðburðinn þar sem keppt er í áhugamannahnefaleikum. Davíð kemur ekki að skipulagningu þessa hnefaleikakvölds.

Davíð segir í raun betra eftirlit með heilsu keppenda í atvinnumannahnefaleikum en hjá áhugamönnum.

„Munurinn á áhugamönnum og atvinnumönnum er orðinn svo lítill. Það er búið að taka höfuðhlífarnar af hjá fullorðnum. Reglurnar [sem varða öryggi og heilsu] eru miklu strangari í atvinnuhnefaleikum. Þú þarft að fara í gegnum heilaskanna, mikið læknaeftirlit og eftir bardaga er mikið athugað,“ segir Davíð en samkvæmt alþjóðlegu regluverki þarf atvinnufólk í greininni að fara í myndatöku á höfði árlega.

Hnefaleikakonan Erika Nótt Einarsdóttir er á meðal þeirra sem gagnrýnt hafa stjórnvöld harðlega vegna stöðunnar.

Á yfirstandandi þingi liggur fyrir frumvarp frá stjórnarandstöðu sem myndi fella úr gildi lögin frá 1956, og setja ramma um bardagaíþróttir almennt, en það hefur enn ekki náð í gegn. 

Á meðan svo er virðist því löglegt að halda til dæmis keppniskvöld í MMA-bardagaíþróttum, eins og gert var með glæsibrag í Framheimilinu um síðustu helgi, og í áhugamannahnefaleikum en ólöglegt að keppa í atvinnuhnefaleikum og óljóst hvort og þá hvaða afleiðingar slíkt mót hefði í för með sér.